PMJVK sum nodal agency hnena la pek loh cheng vbc. 14.34 a awm

Hnam tlem zawkte tihhmasawnna tur scheme, Pradhan Mantri Jan Vikas Karyakram (PMJVK) hnuaiah Mizoram sorkar chuan sorkar laipui aṭanga sum a a hmuh tawh la hman loh cheng vbc. 17.59 a nei a, chu'ng zinga cheng vbc. 14.34 chu PMJVK kalpuitu State Nodal Agency (SNA) hnenah pek a la ni lo.

Sorkar laipuia Minority Affairs leh Women & Child Development minister Smriti Zubin Irani-i'n August 2, 2023-a minister of state TJ Lalnuntluanga hnena lehkha a thawn a; PMJVK hnuaia Champhai district-a Auditorium cum Library sakna tur sum a dil (DO letter no. MOS/PB/L&J/PAD/TRP?EF&CC/1/2018 dated 12.07.2023)-na chungchang a chháng.

Minority Affairs Minister lehkhaa a lan danin, Mizoram sorkarin sorkar laipui a hrilh danin, Mizoramin PMJVK hnuaia sum a dawn tawh zingah la hman loh cheng vbc. 17.59 a nei a, chung zinga vbc. 14.34 chu PMJVK kalpuitu SNA account-ah thun a la ni lo a ni.

Smriti Irani chuan, sorkar laipuia Ministry of Finance kalphung leh inkaihhruaina thar angin, PMJVK hnuaiah pawh state nodal agency (SNA) model kalpui a ni tawh a, kalphung thar angin sum pek chhuah ṭhin a ni. SNA model-ah chuan PMJVK hnuaia state sorkarin project a kalpui tawhte leh project thar a siam te, project neih tawha sum hman tawh dan leh untilisation certificate-te langtlang taka kalpui a ni.

Minority Affairs Minister chuan, kum 2018-19 hma lama PMJVK project pawm tawhtea thil pawimawh hrang hrangte chu Mizoram sorkarin a la siam rem kim lo tih a tarlang a; PMJVK hnuaia hmalak dan tarlanna geo-tagging chu duhthusam a ni lo tih a tarlang bawk.

Smriti Zubin Irani chuan, PMJVK hnuaia sum pek chhuah chungchangah hian SNA kalphung leh PMJVK hnuaia project thar atana guidelines anga thil kalpui a nih theih nan a kaihhnawih department-te hma la tura thuràwn pe turin minister TJ Lalnuntluanga a chah a ni.