ZCSC hruaitute'n CM lawmthu an hrilh

Zomi Council Steering Committee (ZCSC) hruaitute chuan an leader T Kaithang hoin August 12, Inrinni khan chief minister Zoramthanga a pisaah an hmu a, Manipur buaina avanga Mizote'n harsatna nasa tak an tawh chungchanga Mizoram hmalakna avangin an lawm thu an hrilh.

CM Zoramthanga chuan, ZCSC hruaitute chu an kal zel dan turah ṭha nia a hriatte a hrilh a; Mizoramin inthlanpui a hmachhawn dawn avangin engkimah inṭanpui nghal zat zat a harsat palh theih thu a sawi rualin, an tihsak theih awm apiangah sorkarin theihtawp a chhuah zel dawn thu a sawi a, a ṭul anga amah be zel turin a chah.

ZCSC hruaitute chuan, May 3, 2023-a Manipur buai tirh aṭangin Manipur-a Mizote mamawh engkim Mizoram aṭanga an lâk luh thu te, mamawhte tluang taka an lak theih nan Mizoram sorkarin Tuivai lei leh Daido lam kawng a thawm ṭhat thu te, Hliappui-Kawlkulh kawng siamṭhatna tur ruahman a nih thute an sawi.

Manipur-a Mizote Mizoram mipuiin an hmangaih a, media leh kawng tinrênga an ṭanpuinaah te, Mizoram MP pahnih C Lalrosanga leh K Vanlalvena ten Parliament-ah theihtawp an chhuahnaahte an lawm a, an thlamuan phah thu an sawi bawk.