Kuthnathawktute leh ṭhalaite hamṭhatna kan dah pawimawh hmasa ber - Sapdanga

ZPM working president K Sapdanga chuan, Pathian leh mipui zara ZPM-in sorkarna an chan chuan, an ngaih pawimawh hmasak ber tur chu kut hnathawktute hamṭhatna siam leh bána kaih policy hmanga eizawnna ngêlnghet a tam thei ang ber ṭhalaite dinpui a nih thu a sawi.

August 12, Inrinnia Aizawl North-III biala chhung tin a tlawh chhuah thlir lêtna leh lawmthu sawina inkhawm Vanneihtluanga, Chanmari ina neihah Sapdanga chuan, "ZPM sorkar tun din a nih chuan kut hnathawktute thawhrimna a thlâwn dawn lo. Ṭhalai a tam thei ang ber tan eizawnna nghet siamsak kan ngai pawimawh hle dawn," a ti a, budget session hmasa berah an ngaih pawimawh tur pualin sum dah hran a nih tur thu a sawi.

Aizawl North-III biala ZPM candidate atana ruat K Sapdanga chuan, MLA atan thlan tlin a nih phawt chuan a bialah local development committee (LDC) din a tum thu a sawi a, "LDC hian veng chhung hmasawnna hna thawh tur leh thawh hmasak tur, thawh dan tur, thawktu tur a thlang dawn. Hna an vil zui bawk ang," a ti.