MNF-in Airport-ah MP-te an lo hmuak; Hruaitute leh mipui vanga huai thei kan ni - MP

Mizoram MP pahnih - Lok Sabha MP C Lalrosanga leh Rajya Sabha MP K Vanlalvena te chu August 12, Inrinni khan an rawn haw a, Lengpui Airport-ah MNF party mite'n an lo hmuak. MP pahnihte chuan, MNF-a an hruaitute leh mipui thlâwpna vanga huaisen thei an nih thu an sawi.

An puala inkhawm tâwi buatsaihah C Lalrosanga chuan, eptute'n sorkar laipui rin tâwk lohna (no confidence motion) an put luh a thláwp tih sawiin, "MNF hruaitute'n min support avang leh Mizo mipuiin min support tih kan hriat avangin huaisen takin kan awm. Bill pu luttu Gaurav Gogoi pawh an party ni loin, Manipur-a kan unaute thlavâng hauhna atan ka support tur thu ka hrilh," a ti.

C Lalrosanga chuan, an tih tur ve rêng ti an nih thu sawiin, "Kan unaute tana kan tih tur ang chu kan ti zel ang. Central sorkar hotute pawh an lungawi lo. Mahse, kan unaute tana din a, an thlavâng hauh tlat hi kan tih tur a ni," a ti a; an chêt dan avangin National Democratic Alliance (NDA)-a an thawhpui MP ṭhenkhatte'n an biak ṭhat duh tawh loh thu a sawi.

Rajya Sabha MP K Vanlalvena chuan, Uniform Civil Code (UCC) leh Manipur chungchangah a tàwp thlenga NDA do turin chief minister Zoramthanga'n thu a chah thu a sawi a, "Manipur issue hi thil thleng satliah ni loin, tum lâwk sa veka thil thleng nia kan hriat avangin na takin kan do a ni. UCC pawh kan party leh CM pawhin tu mahin kan thláwp lo. Party vanga tu mah hi inbeih fâl a ṭul lo," a ti.

Forest Conservation Bill, 2023 pawm a nih laia Parliament House a chhuahsan chhan sawiin, "Chawhnu session ṭan a ni chiah a, eptu lamin Manipur chungchang sawiho an phût a, Chairman-in sawiho a remtih loh avangin an chhuak vek a, chumi hnuah Bill an pharh. Bill pass laia awm ka duh loh avangin eptu ho rual loin, a hnuah ka chhuak," a ti a; rorelna inah eptute chu bill pawm tur an duh loh avangin an chhuak fo a, an chhuah chhan chu bill an dodal vang a nih ṭhin thu a sawi.