Sorkar hnathawkte'n badge dum an bel dawn; An tan CM-in hun nei lo?

Mizoram sorkar hnuaia thawk pawl hrang hrang intèlkhawmna, Federation of Mizoram Government Em-ployee & Workers (FMGEW) Executive Committee tun hnaia ṭhukhawm chuan, sorkar notification ding lai anga dearness allowance (DA) rate hman phût nan badge dum bel an rêl.

FMGEW chuan, DA chungchang sawipui tura Chief Minister an ngenin awmzia a nei thei lo tih tarlangin, "Kan lungawi lohna lantir nan leh sorkar notification anga DA min pek phût nan August 17-18, 2023 hian FMGEW member zawng zawngte chuan badge dum bel tur a ni," an ti.

Badge dum belin awmzia a neih loh chuan hmalak zel dan tur August 22, 2023-ah FMGEW General Council Meeting-ah an ngaihtuah leh dawn thu an tarlang.

FMGEW chuan an pawla tel association-te chu an member/department/office ṭheuha badge dum bel tur ngaihtuah turin an chah a; member-te'n kim taka badge dum an bel theih nan mahni páwl ṭheuhah bawhzui turin an chah bawk.