KHAWTHLIR

Thisen pe

August 12, Inrinni khan ṬKP, Bawngkawn Bial chuan ZMC blood centre tan thisen unit 110 an pe a, petute mipa 85 leh hmeichhia 25 an ni. KṬP, Bethlehem Venglai Branch-in an din champha vawi 51-na pualin an kohhran hall-ah Synod Hospital tan thisen unit 54 an pe a, petute mipa 40 leh hmeichhia 14 an ni a; ṬKP, Hnahthial South Bial pawhin BCM, Peniel kohhran hall-ah Lunglei Civil Hospital tan thisen unit 65 an pe a, petute mipa 57 leh hmeichhia pariat an ni.

Tanpuina hlan

Central Halam Youth Association, Tripura hruaitute chuan Manipur-a Mizote ṭanpui nan August 12, Inrinni khan Central YMA hnenah Rs 1,25,000 an thawh. Ṭanpuina sum hi CHYA hruaitute'n CYMA Committee Room-ah CYMA president R Lalngheta hnenah a hlân a ni.

Heroin man

Lunglei police-te chuan Lunglei Venglai VDP puihnain August 11, 2023 khan F Lalhmangaihzuala (31), Lunglei Bazar Veng nia inchhál hnen aṭangin heroin gram 137.4 (hawng 12) an man. Lunglei Police Station-ah NDPS Act Section 21(b) hnuaiah thubuai ziah luh a ni.

Minister-in tlawh

Commerce & Industries minister Dr R Lalthangliana chuan August 12, Inrinni zing khan Aizawl New Market-a Mizoram Merchant Association (MIMA) pisa a tlawh a, plastic chair 30 a pe. Minister hi AMC deputy mayor R Thanglura leh executive councillor Lalawmpuii ten an ṭawiawm a ni.

MLA-in hmanpui

Health & Family Welfare Board vice chairman Dr ZR Thiamsanga chuan August 11, 2023 zan khan MZP, Champhai Vengsang Branch-in Vengsang YMA Hall-a zirlai ti ṭha chawimawina hun an buatsaih a hmanpui. He hunah hian Champhai Vengsang huam chhunga graduate leh post graduate zo thar, first division leh a chung lama passm mi 19 hnenah chawimawina hlan a ni. MLA chuan, zirlaite chu ram leh hnam leh khawtlang tana mi ṭangkai nih tum turin a chah.