Minister-in New Market sak mek a tlawh

Commerce & Industries minister Dr R Lalthangliana chuan August 12, Inrinni zing khan Aizawl New Market sak mek chu a tlawh a, hnathawh tawh chin leh hmachhawpte a enfiah bakah, a kaihhnawih sorkar department hotute, contractor leh sumdawng hruaitute a kâwm.

Dr R Lalthangliana chuan, hripui lêng leh inkhuahkhirhna avangin kum hnih chhung hna a khaihlak avangin tum ang huna bazar sak zawh hman a nih loh thu a sawi a; in satu contractor-te chu hna tlo leh ṭha, ram leh hnam tana ro tling sa zo thuai turin a chah.

Aizawl New Market-ah hian in pahnih sak mek a ni a; Commerce & Industries department hnuaiah cheng nuai 3,641.59 sênna tur Aizawl City Centre Annexe leh Aizawl Smart City Project, UDPA hnuaiah cheng nuai 4,159.03 sênna tur Aizawl City Centre sak mek a ni.

Sorkar thuchhuah tarlan danin, Aizawl City Centre hi June 2024-ah sak zawh tur a ni a, Aizawl City Centre Annexe chu January 2024-a sak zawh hman tura beisei a ni thung.

Minister hi AMC deputy mayor R Thanglura leh executive councillor B Lalawmpuii, Aizawl Smart City chief executive officer CC Lalchhuangkima, Commerce & Industries additional director Lalsangpuii leh sorkar official dang te, contractor Lushai Engineers hotute leh Mizoram Merchant Association hruaitute'n an ṭawiawm a ni.