Mizoram sorkar hi Zo hnahthlakte innghahna a ni - Robert Romawia

MNF adviser Robert Romawia Royte, minister of state chuan Hachhek biala khaw hrang hrang - Hriphaw, Kolalian, Zamuang leh Rengdil khuate a tlawh a, vantlang inkhawmah thu sawiin, Zoramthanga kaihhruai Mizoram sorkar chu Zo hnahthlakte innghahna a nih thu a sawi.

Robert Romawia Royte chuan, MNF sorkar chhungin ráltlân, lirnghing, tuilian leh hriat ngai loh harsatna tam tak avangin hna thawhna tur sumah harsatna an tâwk a, sorkar laipui aṭanga sum lo kal tur hmuh loh avangin harsatna an tawh nasat thu a sawi a, "Pu Zoramthanga kaihhruai MNF sorkar hi hnam behchhan a ni a, Zo hnahthlak unaute tan innghahna a ni," a ti.

Sum harsatna karah hmasawnna hna thawh nan sorkar laipui aṭangin sum tam tak hnuh luh a nih thu sawiin Robert Romawia chuan, "Hengte hi sorkar inrêlbàwlna leh hnathawk hlawh atan hman theih a nih lo," a ti a; "Mizoram hmasawnnain khawthlang lam a hawi a, CM Pu Zoramthanga hi Hachhek bialah term khat chhungin vawi nga a lut tawh," tiin, tun hnaiah Hachhek biala kawngpui siamna tur cheng nuai 5,000 ruahman a nih thu a sawi.