MZU Mizo department jubilee lawm

Mizoram University-a Department of Mizo chuan August 12, Inrinni khan MZU Auditorium-ah MZU Department of Mizo kum 25 tlinna, silver jubilee an lawm a, chief minister hlui Lal Thanhawla khuallian niin, MZU vice chancellor Prof. Dibakar Chandra Deka khualzahawm a ni.

Lal Thanhawla chuan, Mizo ṭawng tihhmasawnna tura hma latu zawng zawngte chungah a lawm thu sawiin, MZU Mizo department chu Mizo ṭawng tihausa zual zel tur leh tichangtlung zel turin a fuih a, "Ṭhangtharte'n Mizo ṭawng pawimawhzia an hriat a, dik taka ziak leh chhiar thiam hi Mizo kan nih chuan kan tihmâkmawh a ni," a ti.

Lawmna inkhawm hi Mizo department HoD Dr Ruth Lalremruati'n a kaihruai a, MZU Mizo department din chhoh dan leh hmalak tawhna te, Mizo Cultural Museum din dante leh Painting Gallery buatsaih dante a sawi. Prof. Dibakar Chandra Deka chuan, Mizo ṭawng leh hnam ziate chu thu lehlin hmangtea pho chhuah a ṭul thu a sawi a; Prof. Laltluangliana Khiangte-in thu a sawi bawk.