BJP sorkarah India mi kan ni, tia au a ngai ta - Joseph Himpuia

MPCC general secretary Joseph Lalhimpuia chuan, BJP sorkar hnuaiah India mi kan ni, tia au chhuah a ngai ta chu lungchhiatthlak a tih thu a sawi.

Congress party-in Lunglei East bial vil tura a ruat Joseph Lalhimpuia hian August 12, Inrinni khan an pparty mite hmaah thu sawiin, Congress sorkar laiin hnam hnufualte humhim an ni a, an tan scheme tam tak siam a nih ṭhin thu a sawi a, "Vawiinah chuan BJP an lo lal ta a, India ram rorelna in sang berah chuan 'Foreigner kan ni lo, India kan ni’ tih a lo ngai ta a, a lungchhiatthlak tak zet a ni," a ti.

Joseph Lalhimpuia chuan, Mizorama rorel lai MNF-te'n ‘A ṭul chuan NDA kan zawmna kan ennawn ang’ an ti ṭhin tih sawiin, "Manipur-ah biakin 300 chuang hâl a ni a, in leh lo nei loin mi sang tél an awm tawh. Engtikah nge MNF hian BJP an zawmna hi an ennawn ang?" a ti a; Congress chu BJP nena indo an nih thu te, MNF chu BJP nen an thawkho an nih thu leh, ZPM-in BJP ṭhianah siam an tum thute a sawi bawk.