TNAI hruaitute'n CM an kâwm

Trained Nurses Association of India (TNAI) president Dr Roy K George leh general secretary Evelyn P Kannan te chuan Mizoram an rawn tlawh a, August 12, Inrinni khan chief minister Zoramthanga a pisaah hmuin, Mizoram sorkarin Directorate of Nursing din phalna a pek avangin lawmthu an hrilh.

CM Zoramthanga chuan, hriselna lama hmasawn zel turin Directorate of Nursing neih a pawimawh tih sawiin, "Ram danga hna ṭha tak tak thawh theihna remchang leh thiamna hlu tak chu nursing hi a nih avangin sorkar chuan nursing lam tihchangtlun deuh deuh a tum a ni," a ti a; nurse-te'n hnam dang ṭawng an zir a, ram danga hna ṭha zawk an thawh theih nana hmalak sorkarin a ngaih pawimawh thu a sawi bawk.

TNAI hruaitute hi TNAI, Mizoram hruaitute'n an ṭawiawm a; TNAI, Mizoram Branch-in office leh hmunhma an neih theih nan Aizawlah ram an leisak thu leh an hmalak zel dan tur ruahmannate Chief Minister an hrilh a ni.