ZPM-in street campaign an buatsaih

ZPM party chuan August 12, Inrinni khan Aizawla hmun hrang hranga street campaign an buatsaih. ZPM Legislature Party secretary Dr Vanlalthlana chuan, ZPM chuan an din tirh aṭangin nasa taka beih an tawh kara hma an sawn zel chu Pathianin Mizoram kaihruai tura ZPM a duh vang nia a lan thu a sawi.

Durtlang Leitana thu sawitu Dr Vanlalthlana chuan, Mizoramin hmasawnna hmel thar a hmuh theih nan danglam tura an infuih ṭhin thu leh chu chu party dangte'n ZPM beih nan an hman ṭhin thu a sawi a, "ZPM hi kan din tirh aṭangin beih kan tâwk nasa ve khawp mai a, kan do dai ve zel. Heti khawpa min bei chunga hma kan sawn ve zel hi Pathian hian Zoram kaihruai tur hian min duh ve tawh niin a lang," a ti.

Vaivakawn bazara thu sawitu TBC Lalvenchhunga, Aizawl West-I biala ZPM candidate tur chuan, BJP hnena sum khawn anga ZPM putute chu BJP hnena sum diltu zawh chhuahsak turin a ngen a, "ZPM hian BJP an ni emaw, Congress an ni emaw, kum 2023 MLA General Election-ah kan thawhpui dawn lo," a ti a; ZPM candidate-te chu eiru lo turin an intiam a, eiru thiang an ni lo tih a sawi.

TBC Lalvenchhunga chuan, Mizoram hruai tawhtu party hrang hrangte an chhe thar thut lo tih sawiin, Kan hun a inang lo mai a ni. He ram hian siamṭhat a ngaihzia kan sawi ṭhin a, chhe lailet dêrin kan sawi ngai lo. ZPM hi kan famkim lo tih kan pha lo a, ram siamṭha turin famkim lo chung chungin kan pên chhuak ve mai a ni," a ti.

AMC councillor Christina Roluahpuii Sailo chuan Zemabawk bazarah thu sawiin, "Kan ram siamṭhat hna hi party hruaitute leh party-a inhmangte kut ringawta dah loin, nang leh kei hian kan vote hmangin tih theih kan nei ve a ni," a ti a; ram tana ṭha tur ngei vote chhuah a nih theih nan politics ngaihven turin Mizoram mipui a sáwm.

Chhangurkawna thu sawitu Lalnghinglova Hmar, Aizawl West-II biala ZPM candidate tura ruat chuan, sem tur an nei lo a, kalphung thar an zuar tih sawiin, "Mi retheite hamṭhatna a awm dawn. Mizoram ṭha zawk a awm theih nan kal kan tum a, sorkar ṭha zawk din tuma kal khawm kan ni. Sorkar hna lak a nih dawn chuan ṭhalai lehkhathiamin an nghakhlel a, induhsakna vanga hna lak hi tihtawp kan tum," a ti.