City leh Haaland an la pangngai

Premier League champion Manchester City leh an striker ṭha Erling Haaland te chuan an ze ngai an la pu reng, chu zia chu chak leh goal khung a ni, season tharah pawh an danglam lo.

English football inelna sang ber EPL hi August 11, Zirtawpni zan khan match hmasa ber khelh ṭan niin, minute lina lekah Haaland chuan a hna ngai a thawk leh ṭan a, chawlhlawk hmain an goal hnihna a nei leh nghal bawk. Goal hnih hi 'striker goal' tia sawi ve ve theih a ni. Norwegian striker hian goal hnih ngawt a khung chung hian Pep Guardiola aṭangin zilhna a dawng tho - Spanish manager hian ṭha thaw khat a duh lo a, sawisel boa khelh a duh!

EPL-ah hian season tir lama goal hmasa ber leh a dawttu khung thei hmasa ber chu Haaland a ni leh ta a, a goal hmasa zawk siamsaktu Rodri chuan an goal thumna khung leh bawkin an mikhualna ramah Burnley chu 3-0 in an hneh.

Pep Guardiola-a'n player a siksawi nasa leh hle, defender pali zingah Manuel Akanji chauhin a khel tluan a, rinrawl tura ngaih Ruben Dias leh John Stones te chu squad-ah pawh an awm lo a, forward Jack Grealish chu a la inlan lo bawk.

Man City hian August 16, Nilaini zanah Sevilla nen UEFA Super Cup chu an khel dawn a, kartawpah team ṭha Newcastle United an mikhual zui leh nghal dawn, fixture a hautak avangin Spanish manager tan thluak hman a ngai a ni.