2019 chhungin cyber crime Thubuai 11 ziah luh a ni
Mizoram Police-te chuan nikum 2019 chhung khan cyber crime kaihhnawihah thubuai 11 an ziak lut a; thubuai ziah luh zingah social media kaihhnawih a tam ber. Police-te chuan, cyber crime chhuina tur hmanrua an neih ṭhat thu an sawi.
Vanglaini palai zawhna chhangin CID (Crime) hotute chuan, kum 2019 chhungin cyber crime thubuai 11 ziah luh a nih thu an sawi rualin, January, March, July, August, September leh December thlaahte thubuai ziah a awm lo tih an sawi. Thubuai luh dan chu - February thlaah 2, April-ah 3, May-ah 1, June-ah 2, September-ah 1, October-ah 1 leh November thlaah 1 a ni.
CID (Crime) hotute sawi danin, cyber crime kaihhnawih thubuai hi police station zawng zawngah thehluh theih a ni. Thubuai azirin office incharge (OC)-te'n CID (Crime) puihna an dil ṭhin a, thawkhoin thubuai an chhui ṭhin. Thubuai ṭhenkhat erawh CID (Crime) lam pun kher loa police station-a OC-te'n an chhui zawhte pawh a awm. Thubuai eng emaw zatah chuan, chhui chhuah a nih hnuah thil sual titu leh a tuartute inbiak rem vanga thubuai tihtawp zui a ni.