Assam leh Mizoram an inbe hnai? Mizoram thu Assam-in an la chháng lo

State ramri chungchangah Mizoram sorkar leh Assam sorkar aiawhte an inbe leh hnai mai thei niin Home department hotute hnen aṭangin thu dawn a ni.

Assam Home department-a Additional Secretary chuan Mizoram Home department hotute telephone hmangin a bia a, ramri chungchanga inbiak hnaih ṭha an tih thu leh Assam Border Area Protection and Development minister Atul Bora remchan hun an nghah mek thu an rawn hrilh.

Hetih lai hian, Mizoram sorkarin Mizoram ramri china a pawm leh thil dangte Assam sorkara a thehluh tawh chungchang chu Assam sorkarin an la chháng lo.

Mizoram sorkar chuan ramri china a pawm leh thil dangte March 2023 vel khan Assam sorkarah a thehlut tawh a, nimin thleng khan Assam sorkar aṭangin chhanna a la dawng lo a; hei vang hian Mizoram sorkar thu thlen an pawm leh pawm loh hriat theih a la ni lo.

Mizoram sorkarin Assam sorkar hnena an thu thehluhah hian, Assam-in an state chhung anga a hauh mek khaw 62 chu Mizoram chhunga mi a nih thu leh Mizoram chhunga rîn luh tur a nih thu tarlan tel a ni.

November 17, 2022-a Guwahati, Assam-a Mizoram sorkar leh Assam sorkar aiawhte inbiak ṭumin Joint Declaration-ah Mizoram sorkarin ramri china a pawm chhunga khaw awm te, a huam chin te, geo spatial extent te, a huam china chêngte hnam chanchin leh chi (ethnicity)-te leh chanchin dangte Assam sorkarah thehlut tura tih a ni.

Joint Declaration-ah chuan, "Heng chanchin thehluhte hi ramri buai chinfelna tura la din tur state pahnih aiawhte telna Regional Committee-in an enfel ang a, chanchin lâk khawm kawngah Assam sorkarin a theihna apiangah Mizoram a pui ang," tih a ni.

Inbiaknaah hian Mizoram team chu Home minister Lalchamliana'n a ho a, Assam team chu Assam Border Area Protection and Development minister Atul Bora-a'n a ho thung.

Tarlan tawh angin, Mizoram leh Assam ramria Mizoram sorkar dinna chu Bengal Eastern Frontier Regulation, 1875-in a tarlan ang a ni.