Aizawlah heroin hawng 121 man a ni; Raltlan ruihhlo mansak an awm nual

Excise & Narcotics department (END) leh an thawhpuite chuan August 13, Pathianni khan Aizawla hmun pahnihah heroin kg. 1.322 (hawng 121) leh a neitua puh mi pali an man. END chuan, Manipur ram buai vanga Mizorama ráltlâna lutte aṭangin ruihhlo man a awm nual tawh tih an tarlang.

END hian August 13 chawhnu dar 2:40 khan Khiangte Homestay, Bawngkawn aṭangin heroin kg. 1.216 (hawng 102) an man a, a neitua puh Lamminthang Singson (40) s/o Paotinsei, Monglen Phai, Churachandpur district, Manipur leh Chingmuankim (31) d/o Gaoumang, Thingkahphai, Churachandpur, Manipur nia inchhálte an man nghal.

August 13 vêk zan dar 7 khan END chuan Central YMA hnuaia CADS nen thawk dunin Salem Vengah heroin gram 106 (hawng 9) an man a, a neitua puh Lalawmpuii (30) d/o C Vanlalruata leh Zonunsiami (46) d/o Liandawla, Salem Veng ve ve nia inchhálte an man bawk.

Heroin vanga mante lakah hian Narcotics Drugs & Psychotropic Substances Act, 1985 tlawhchhanin thubuai ziah luh a ni.

END chuan, "Tunlai hian Manipur aṭanga ram buai vanga Mizorama ráltlâna lo lutte aṭangin ruihhlo man leh Manipur aṭanga ruihhlo rawn keng lut man a awm nual tawh," an ti a; ráltlânte lo mikhual thei leh in luahtir an awm palh theih avangin, fimkhur turin Mizoram mipui an chah.