Health Director hlui kum 1 táng tur leh cheng nuai 24 chawi tura tih a ni

Aizawl District Court-a Special Court (Prevention of Corruption Act) chuan Health department director hlui leh National Rural Health Mission mission director hlui Dr N Pallai chu sorkar sum eirûk vangin kum khat chhung táng tur leh cheng nuai 24 chawi turin a hrem.

Dr N Pallaia eiruk thubuaiah hian Special Judge (PC Act) Dr HTC Lalrinchhana chuan August 11, 2023 khan judgement tichhuakin, thiam loh a lo chantir tawh a, nimin khan hremna tur tichhuak leh a ni.

N Pallaia hi August 11-a thiam loh a chantir hnuah eirûk thubuai danga Court-in May 15, 2023-a a hrem vanga bail-a a chhuah mekna chu tihtawp nghal niin, jail-a dah luh nghal turin Court chuan a ti a; mahse, a hnuah Dr Pallai hi a hriselna a ṭhat loh avangin Civil Hospital, Aizawlah admit niin, nimina sentence hearing-ah pawh Court-ah a inlan thei lo a ni.

Special Court hian Dr N Pallai hi thubuai pali-ah kum khat zel tang tur leh Rs 6,00,000 zel chawi turin a hrem a; mahse, Dr Pallai hi kum upa lam a nih avang leh eirûknaa inhnamhnawih thei tawh lo tur a nih avangin jail-a a tàn hun tur chu kal kawptirin, kum khatah tlak tura tih a ni. Pawisa a chawi tur erawh a hran ṭheuha kal tura tih niin, cheng nuai 24 chawi tura hrem a ni a; pawisa a chawi loh chuan kum 12 dang tàn belh turin a ti bawk.

Dr N Pallaia'n thiam loh a channa thubuai palia sum tihchingpen belh khawm chu Rs 67,09,360 a ni a, Rs 4,19,360 chu hmuh let tawh a ni. Dr Pallai hi Health department-a EE Lalsangliana Chhakchhuak nen kum 2007-a cheng nuai 29.48 eirûkna thubuaiah Special Court-in May 12, 2023 khan thiam loh a chantir tawh bawk a, kum li táng tur leh cheng nuai 24 cháwi turin a lo hrem tawh
a ni.