Meri Maati Mera Desh pualin district hrang hrangah hun hmang
India ramin zalenna a hmuh kum 75 tlin lawmna, Azadi Ka Amrit Mohatsav (AKAM) hmáwrbâwkna atana ruahman 'Meri Maati Mera Desh' pualin nimin khan district hrang hrangah hun hman a ni. Campaign hian August 9-30, 2023 chhung a awh ang.
Meri Maati Mera Deshhmang hian India ram hmun hrang hrangah khua leh tuite inpumkhatna tura hmalakna leh ram tana nunna hlantute chawimawina hun buatsaih a ni a, martarte puala lungphûm (Shilaphalakam) te, ram tana inpekna tithar leh tura thutiam (Panch Pran Pledge) sawi rual te, khaw tinah thing ṭiak 75 phun leh, khaw tin aṭanga lei lak khawm hmanga Karavya Path hmuna martarte huan 'Amrit Vatika' siamte a tel.
Lungleiah chuan DC pisa tualah bawrhsap Ramdinliani hoin hun hman a ni a, ram tana inpekna tithar leh turin thutiam an sawi rual. Zalenna sualtute chawimawina hun an hmang a, hnam puanzar pawh pharh a nih bakah, national anthem sakho a ni.
India ram zalenna sualtu Darthâwma, Lunglei Chanmari leh ram tana nunna hlantu subedar Lalruala, Serkawn hnenah chawimawina hlan a ni a, chawimawina hi an chhungte'n an dawng.
India sipaia rifleman Sapchhawna Lushai, Ṭawipui Grouping Centre, rifleman LK Chakma, Tiperaghat leh sepoy F Lalawmpuia, Thingfalte chu an awmna RD block kaltlangin chawimawina hlan a ni ang.
Kolasib-ah chuan DC pisa tualah bawrhsap John LT Sanga'n campaign pualin hnam puanzar a pawt pharh a; martarte huan ‘Amrit Vatika’ siamna tura Kolasib district khaw hrang hrang aṭanga lei lakte chhùn khawm a ni. Har Ghar Tiranga pualin hnam puanzar tár chungin Two Wheeler Rally neih a ni a; sorkar hnathawkte leh a remchang apiangte telin, Kolasib khawpui chhung fan kual a ni.
Serchhipah chuan bawrhsap David Lalthantluanga hoin Serchhip High School-ah hun hman a ni a; SDO (Sadar) Rebecca Laldinmawii Hrahsel kaihhruaiin ram tana inpekna tithar leh turin thutiam an sawi rual.
Bawrhsap chuan ram tana nun hlantu sipai pali - PC Lalrinmawia, Joseph Rothangpuia, Jerusalemthara, leh Biakrotluanga te lungphun a hawng a, Sipai Tlangah Vasudha Vandhan hun hman niin, thing ṭiak 75 phun a ni.
Lawngtlaiah chuan bawrhsap H Lalhmingthanga'n Chandmary Primary School-I chhungah Meri Maati Mera Desh campaign pualin Hav. J Lalrohlua, 2nd MAP hriatrengna lungphun a hawng a, martar chhungte chawimawina hun a hmanpui. Bawrhsap hian hnam puanzar a pawt pharh a, ram hmasawn nana thawk tura intiamna an sawi rual bawk.