Ni 100 inhlawhnaah Aadhaar card nei lote an inhlawh thei tawh dawn lo

Rural Development minister Lalruatkima chuan nimin khan New Delhi-ah Ministry of Rural Development hotute a kâwm a; sorkar laipui hotute chuan ni 100 inhlawhna kalphungah Aadhaar card nei lote chu inhlawhna an pek ve theih tawh dawn loh thu leh a rang lama hma an rawn lâk dawn thu an lo hrilh.

Sorkar thuchhuah tarlan danin, Lalruatkima hian sorkar laipuia Rural Housing deputy director general Gaya Prasad hnenah Mizoramin mirethei leh harsa zawkte tana in sak ṭanpuina (rural housing) chungchanga harsatna tam tak a tawhte a hrilh. Gaya Prasad chuan, tun kar chhungin Mizoram tan cheng nuai 6,000 pek chhuah a nih tur thu a lo hrilh a ni.

Ministry of Rural Development hnuaia MGNREGA joint secretary Amit Kataria pawh kâwmin Lalruatkima chuan Mizoram mamawhte a thlen. Amit Kataria chuan, tun karah Mizoram mamawhte tihpuitlin ngei a tum thu a lo hrilh bakah, Mizoram chu tehna hrang hranga India ram state tê zingah ti ṭha ber pawl a nih avangin Mizoram mamawh ang chu tih vat vat a phûr thu a sawi.

Sorkar thuchhuah tarlan danin, Lalruatkima'n sorkar laipui hotute a dàwrnaah hian MGNREGS hnuaia ni 100 inhlawhna kalphungah Aadhaar card nei lote chu inhlawhna an pek ve theih tawh dawn loh thu leh, chumi chungchangah chuan a rang lama hma an lak tur thu an lo hrilh a ni.