Walkathon for Skill Development buatsaih

Independence Day vawi 77-na lawmna leh Azadi Ka Amrit Mahotsav khàrna pualin nimin zingah khan Labour, Employment, Skill Development & Entrepreneurship (LESDE) department chuan 'Walkathon for Skill Development' an buatsaih a, MLA Zothantluanga'n a vailiam.

Walkathon-ah hian Vanapa Hall kawt aṭangin Millennium Centre thleng zirlai leh department hotu mi 350 chuang kein an kal a; thupui chu 'Youth skills and learning for a transformative future' tih a ni.

Vanapa Hall kawta inkhawmah Zothantluanga chuan, India ramah ṭhalai kum 25 hnuai lam an tam ber tih sawiin, "Hna thawk rual zingah 10% chauh hna thawk tura thiamna nei an ni a, ram changkang zawkte hi ram leilung hausakna ngah ber ber an ni bik lo a, an ṭhalaite thiam thil lamah an sang a, chu chuan ram hausa leh thil ti theiah a awmtir a ni," a ti.

Mizoramah zir thlen theih chin thleng tawh, an zir thiam ang thawh tur hmu mai lo tam tak an awm thu sawiin Zothantluanga chuan, "Hei vang hian kan zirna kalpui chunga themthiamna lamah hma kan sawn a, thiam thil hrang hrang zirna kan bawh a ṭul," a ti a; zirlaite chu lehkha zir chunga thiam thil zir ngai pawimawh tur leh hmasawn tum turin a chah.

LESDE secretary Lalramsanga Sailo pawhin thu sawiin, Mizo ṭhalaite'n zirna bakah, thiam thil zirna an neih a pawimawh thu leh LESDE chu hman ṭangkai tum turin kal khawmte a chah a ni. Millennium Centre kawta Walkathon khârna inkhawmah LESDE director Angela Zothanpuii'n thu a sawi bawk.