Min beitute lakah hnehna kan chang dawn - C Lalrosanga, MP

Lok Sabha MP C Lalrosanga, MNF adviser ni bawk chuan, MNF chu 'Pathian leh kan ram tan' titu an ni a, an lamah Pathian a ṭan avangin anmahni beitute lakah hnehna an chang zel dawn niin a sawi.

C Lalrosanga hian nimin khan Mizo Hnam Rûna inkhawmah thu sawiin, "Pathian leh kan ram tan titute kan ni a, Pathian kan lama a ṭan avangin min beitute hriamhrei chher hi a sâwt dawn lo. Pathian zarah hnehna kan chang zel ang. Thil ṭha tia theihtawp kan chhuah ve laiin beih kan tâwk fo a, rilru nat cháng pawh a awm ṭhin. Mahse, diriam taka min beitute tàwpna hi a ropui vak ngai lo," a ti.

Lok Sabha MP chuan, NDA ṭhutkhawmah Manipur chungchang leh UCC chungchang sawi an phal loh avangin thu a sawi duh loh phah nia sawiin, "A hnua MP inkoh khawmah pawh Manipur leh UCC chungchang sawi an phal loh avangin kan haw phah a, a hnu lam meeting-ah pawh kan tel duh loh phah zel," a ti a; session-ah Manipur chungchang sawi a tum reng a, thusawi a dilna a pilbo zel bakah adjournment motion a thehluh pawh hnâwl a nih thu a sawi.

Parliament House-ah hmui phuarsak ni mah se, national media-in Manipur buaina chungchanga an dinna an hriat avangin an bàwr nasa nia sawiin C Lalrosanga chuan, "Na tak leh huai takin kan dinna ka sawi theih phah. NDA lama kan ṭhiante pawhin min be ṭha duh lo a, chibai pawh ka dawng thei ta mang lo hial," a ti.

Mizo Hnam Rûna inkhawmah hian MNF zawm thar mi 26 lawm luh an nih thu MNF thuchhuah chuan a tarlang.