MPCC-in LS MP thu sawi rin harsa an ti

Lok Sabha MP C Lalrosanga’n NDA sorkar rin tâwk lohna motion a thlàwp tih a sawi chu ama sawi chauh hriat tur a awm avang leh, Citizenship Amendment Bill-a a chêt tawh dan avangin rin harsa an tih thu, MPCC chuan thuchhuah siamin an tarlang.

MPCC chuan, NDA sorkar rin tâwk lohna motion-ah C Lalrosanga'n NDA lama ṭhu chunga motion a thlàwp thu a sawina video record hriat tur a awm lo niin an sawi a, "NDA sorkar rin tâwk lohna motion a thláwp tih thu hi ama sawi chauh mipuiin kan hria a, CAB-ah Mizo mipui hnena a insawi loh dana a lo awm tawh avangin tuna a thil sawi pawh hi a ni ngei em tih rin a harsa hle a ni. BJP kaihhruai NDA sorkar a thláwp lo tak zet a nih chuan NDA chhuahsan mai hi thil nih dan tur zawk a ni," an ti.

Congress party chuan, "Mizorama political party hrang hrang hian BJP thuhnuaia kûn leh kûn loh chungchang hi Mizoram mipui hriatah kan dinna ṭheuh chiang taka kan tarlan a hun tawh," an ti a; MNF chu BJP kaihhruai NDA leh NEDA an duh loh tak zet chuan Congress party hmalaknaa din Mizoram Secular Alliance-a tel turin an sáwm a ni.

MPCC chuan, "Kan ram, kan hnam, kan sakhua a him theihna turin Congress party chuan theihtawp chhuahin hma a la zel dawn," tiin, BJP rorelna paihthlak a nih theih nana Congress party thawhpui turin Mizorama party dangte chu an sáwm a; "Union Home minister Amit Shah-a’n Burmese tia min sawi duh hi a makin, NDA hnuaia an thawhpui MNF MP-te an thamlohzia leh an hmusitzia a tarlang," an ti bawk.