Serchhipah Youth-20 Meet buatsaih

Sports & Youth Services department leh MZP chuan nimin khann Serchhip Auditorium-ah Youth-20 Meet on Nationalism, Patriotism & Development an buatsaih a, Serchhip khawpuia sikul leh college zirlaite an tel a, minister Lalchhandama Ralte-in a hmanpui.

Lalchhandama Ralte chuan, ram leh hnam hmangaihna leh hmasawnna chu kal kawp tur a nih thu sawiin, "A kal kawp theihna tur chuan intodelh a ṭul a, taimâk, tawrhchhel leh teirei peih a pawimawh. Kan hnam thilte ngaisanga chawisang tur leh kan ṭawngte vawng him turin ṭan kan lak a ṭul," a ti. Ram leh hnam changkansan a thiang lo tih sawiin, "Hnam thinlung pu tura kan inzirtir a ngai a, thinlung dik kan pu tur a ni," a ti bawk.

Y20 Meet hi Serchhip College principal C Laldintluanga’n a kaihruai a; MZP Gen. Hqrs president Lalnunmawia Pautu leh MZP Sub-Hqrs, Serchhip president Laltlanmawia te pawhin thu an sawi a ni.

India ram G-20 president a nih chhungin ram chhung hmun hrang hrangah Ministry of Youth Affairs & Sports chuan Youth-20 programme a buatsaih a; Mizoramah pawh SYS department leh MZP-in district hrang hrangah Y-20 Meet on Nationalism, Patriotism & Development Programme an buatsaih ṭhin a ni. Meet hi July 14, 2023 khan chief minister Zoramthanga'n a hawng.