Mamitah hmeichhe hostel hawng

Samagra Shiksha, Mamit hnuaia sak, Netaji Subhash Chandra Bose Awasiya Vidhyalaya (NSCBAV) Secondary Girls Hostel chu bialtu MLA H Lalzirliana'n nimin khan a hawng.

Hostel hi mi 30 awm theihna tur a ni a, Mamit High School aṭangin zirlai 10 leh Mamit Higher Secondary School aṭangin zirlai 20 an awm ang. Hostel enkawltu tur hrang hrang dah nghal a ni.

H Lalzirliana chuan, Mamit district-in zirnaa hmasawnna hmel an hmuh theih nan bung thar an kai tih sawiin, "Mamit district hi zirnaah kan hnufual ṭhin hle a, aspirational district hiala thlan kan ni. Heng hi a chhan chu zirnaah leh hriselna lama tehfung hrang hrangah kan nih tur kan phâk loh vang a ni a, district mipuite'n rilru leh ngaihtuahna dik neia tumna sang tak nen district hmasawn ni tura ṭan kan lak a ṭul," a ti.