KHAWTHLIR

Thisen pe

Lungleia Higher and Technical Institute, Mizoram (HATIM) NSS leh Red Ribbon Club chuan nimin khan an college-ah thisen pek an huaihawt a, Lunglei Civil Hospital tan thisen unit 109 pein, petute mipa 89 leh hmeichhia 20 an ni.

Lalpa a tha

Zohmingthanga Tlau lehkhabu ziah, 'Lalpa a ṭha' tih chu nimin khan Lalrammawia Ngente-in Aizawl Press Club-ah a tlangzarh. Lehkhabu hi Synod Bookroom leh lehkhabu dawr hrang hrangah lei theih a ni.

Thutiam sawi rual

Champhai DC James Lalrinchhana leh IPRO C Lalremruati te kaihhruaiin nimin khan Har Ghar Tiranga pualin Kahrawt Community Hall-ah Gandhi Memorial Higher Secondary School zirlaite leh zirtirtute'n hnam puanzar kengin national pledge an sawi rual.

Hna vil chilh duh

PC party chuan thuchhuah siamin, Commerce & Industries Minister-in New Market sak mek August 12, 2023-a a tlawh leh a ṭha thei ang bera sa tura thawktute a fuih chu lawmawm an tih thu an tarlang a, "Hmanraw ṭha leh rintlak zawk nena thawh ngei a nih theih nan contractor-te hnathawh leh hmanruate endika vil chilhtu dah ni se kan duh hle," an ti.

Kuhva rah man

Assam Rifles sipaite chuan nimin khan Champhai Chhungte huam chhungah Myanmar aṭanga dan loa lak luh kuhva rah ip 61 an man a, Champhaia Customs department hnenah an hlan. Kuhva rah an man hi Rs 34,16,000 hû a ni.

Tuitla la hmu lo

August 13, Pathianni chhun dar 12 vela Tlawng lui, Nghalchàwm kaia tla Lalmuanpuia (26) s/o Rokhuma leh Lalropeka (15) s/o Lalpekmawii, Ramthar Veng, Aizawl ve vete chu nimin tlai thleng khan hmuh an la ni lo. Tuitla zawng hian Ramthar Veng, Nghalchawm, Sihhmui, Sairang leh Central YMA hnuaia Rapid Respond Team an thawk chhuak a ni.