Independence Day vawi 77-na lawm a ni

Nimin khan Mizoramah Independence Day vawi 77-na lawm a ni a, Aizawlah chuan zing dar 8 aṭangin Lammualah lawm niin, chief minister Zoramthanga khuallian a ni. Chief Minister chuan, kum li leh a chanve chhunga a kaihhruai sorkarin hna a thawhte chu a lungawithlak thawkhata a hriat thu a sawi.

CM Zoramthanga hian hnam puanzar a pawt pharh a, parade contingent 27-te'n hnam puanzar chibai an bûk a chháng lêt. I-Day pualin Mizoram mipui leh khawvel hmun hrang hranga India khua leh tuite duhsakna a hlan a, Mizoram sorkar hnathawh tawh te, hmalakna kal mek leh hmachhawpte a sawi a ni.

Chief Minister chuan, I-Day a thlenin mahni inphata ram tana zalenna sualtu, hruaitu ropui tak takte chibai bûkin, "He ni ropui takah hian Mizo fa, India ramin zalenna a hmuh theih nana beitu zawng zawngte zahna chibai ka bûk a ni," a ti a; kum 200 chuang awp beha India a awmna aṭanga mahnia ro inrêl ram ni tura beitu zawng zawng zahna chibai bûk thar turin mipui a sáwm.

A kaihhruai sorkar chu kum li leh a chanve kal ta chhungin harsatna chi hrang hrangin a tihbuai karah Mizoramin kawng tinréngin hmasawnna hmel a hmu chho zel tih sawiin Zoramthanga chuan, "Covid hripui vangin kawng tinréngah harsatna tâwk mah ila, ram mipui hamṭhatna tur hmasawnna duhawm tak tak nei turin sorkar chuan theihtawp chhuah a ṭhulh ngai lo... Kum li leh a chanve chhunga kan hnathawhte hi a lungngawithlak thawkhat in ka hria. Tling lo tak chunga hruaitu ka nihna angin hlawhtlinna kan hmuhte hi a lawmawm tak zet a ni," a ti.

CM Zoramthanga chuan, hmalakna tam tak an neih zinga tam tak tihhlawhtlin a ni tawh tih sawiin, "Hmachhawp tam tak kan la nei a, kawng tinréngah tih tur tam tak a la awm," a ti a; Mizoram leh a chhunga chengte tana kawng tinrénga hmasawnna siam tura theihtawp chhuah turin mipui a sáwm.

Kum li leh a chanve sorkarna an chelh chhunga Mizoram mipui, tlawmngai pawl leh kohhrante thlàwpna ṭha an dawn avanga a lawm thu sawiin Zoramthanga chuan, "Tun hnaia harsatna tâwk, mangang leh ṭanpui ngaite ṭanpuina atana khawtlang leh mimal anga kan inpekna leh kan huaisennate hi a ropui ka ti tak zet," a ti a; sorkar hnathawkte thawhrimna leh inpeknate chhuanawm a tih thu te, chanchinbumite leh Mizorama sorkar laipui pisa hrang hranga thawktute chungah a lawm thu a sawi bawk.

Chief Minister hian sorkar hnathawk zinga an hna thawk ṭhate hnenah chawimawina a hlân a, parade-a ti ṭhate hnenah lawmman a hlan bawk. Parade-ah hian contingent 27 awmin, armed contingent leh unarmed contingent paruk ve ve, school contingent 12 leh band party pathum an ni a; parade commander Rishi Kumar, IPS leh assistant parade commander Tikam Singh Verma, IPS an ni.