Kuhva chíngtute an la duty zui zel; Kan kuhva kan hralh ṭhat phah - HBKCP

Hachhek Bial Kuhva Chingtu Pawl (HBKCP) hmalaknaa July 12, 2023 aṭanga Zamuang police check post-a kuhva chíngtute an duty ṭhin chu an la chhunzawm zel a, englai pawha duty turin an inchhâwk ṭhin. HBKCP hruaitute chuan, kuhva tawlhrûk kal tur vengtu an indah avangin kuhva hralhah harsatna an tâwk tawh lo tih an sawi.

Vanglaini palai zawhna chhangin HBKCP hruaitute chuan, kuhva tawlhrûk vengtu an indah chin tur an sawi thei lo tih an sawi a, "Police-te rin mai harsa kan ti rih. Eng chen nge kan duty dawn kan la sawi thei mai lo a, kan kuhva rahte kan hralh zawh vek hma chuan duty kan indah ve rengin a rinawm. Member-te pawh an la phûr viau," an ti.

Kuhva tawlhrûk vengtu an indah hnuah kuhva tawlhrûk a ziaawm thu sawiin HBKCP hruaitute chuan, "Myanmar aṭanga kuhva rah a rawn kal tlem tâkah chuan agreement kan siampui hnam dangte pawhin kan kuhvate agreement angin an lei ngam tawh," an ti a; kuhva an tharte ṭha taka an hralh mek thu an sawi.

HBKCP hruaitute sawi danin, Myanmar aṭanga kuhva rah tawlhrûk, khawthlang tlangdung kaltlanga state páwna a kal tam lai chuan kuhva an tharte lei ṭhintute'n a hralhnaah harsatna an tawk ṭhin a, chuvang chuan inremna an siam chungin kuhva an lei ṭha ngam ngai lo a ni.

HBKCP chuan Zamuang police check post-a duty indah chu duh tâwk mai loin, Tuidam leh Kawrtethawveng inkarah check post an siam a, chutah chuan englai pawhin duty an indah a, inchhâwkin duty an dah a ni. Khaw hrang hranga mite'n kuhva rah tawlhrûk an invèn chhâwk a, HBKCP chuan an thingpui lumna tur Rs 500 an pài ṭhin.

Tarlan tawh angin, HBKCP hruaitute July 11, 2023-a ṭhukhawm chuan Zamuang police check post-a duty police thâ tichak turin check post-a duty dah ve an rél a; July 12 zing dar 9 aṭangin duty an dan ṭan.

Chhumlo chat loin, ni khatah darkar 24 chhung duty an dah a, Hachhek biala khaw hrang hranga kuhva chíngtute an in duty chhâwk ṭhin a ni.