Mizoramin hruaitu rintlak kan mamawh - MPCC Treasurer

Mizoram Pradesh Congress Committee (MPCC) treasurer Dr Lalmalsawma Nghaka chuan, Mizoram kaihruai turin thusawi thiam ringawt ni lo, a taka che chhuak a, insawi anga nung ṭhin hruaitu rintlak a mamawh tih a sawi.

MPCC Treasurer hian nimin khan Aizawl South-II bial chhunga Tlangnuam Vengthara lawm luhna inkhawmah thu sawiin, "Kan ramah hian hlemhlêtna laka fihlim hruaitu kan mamawh hmasa ber. Kan ram min kaihruai turin thusawi thiam ringawt ni lo, a taka che chhuaka mahni insawi anga nung ṭhin hruaitu rintlak kan mamawh tawh hle a ni," a ti.

Lalmalsawma Nghaka chuan, kum tàwp lama inthlanpuiah ram kaihruaitu atana ṭha ber tur Mizoram mipuiin ngun taka an bùk a ngaih thu sawiin, "Party tin hian chief ministerial candidate kan nei ṭheuh a, chung zingah chuan Pu Lalsawta, Pu Zoramthanga leh Pu Lalduhoma te hi mipuiin kan bûk dawn," a ti a, eirûknaa fihlim leh mi dik thlan chhuah a ṭul thu a sawi.

MPCC president Lalsawta chu term hnih chhung minister lo ni tawh a ni tih sawiin Lalmalsawma chuan, "Eirûkna laka fihlim ngam a ni a, sawi tawh anga awm ṭhin a ni tih kan hre bawk. Ani kaihhruaina hnuaiah Mizoram hian hmasawnna hmel thar kan hmu ngei ang tih a chiang hle a ni," a ti.

Party ṭhenkhatin, 'Ka eiru lo ang' tih thu an tiam chungchangah MPCC Treasurer chuan, "Sawi ringawt a tâwk lo a, a taka nunpui a ngai," a ti a; Congress party president Lalsawta lamah ṭang turin Mizoram mipui a sáwm a ni.