SEDP sem tikhawtlai lo turin phût

PC party chuan thuchhuah siamin, MNF sorkar flagship programme, Social Economic Development Programme (SEDP) second phase hnuaia ṭanpuina dawng turte pawisa pek tikhawtlai lo turin Mizoram sorkar an ngen tih an tarlang.

PC chuan, "Tun hnaiah SEDP Executive Board chairman H Rammawia'n SEDP second phase chu August thla chhunga sem theih ngei tura buaipui a nih thu leh sum sem turah harsatna a awm loh tur thu a lo sawi tawh chu chhuanlam dang siam lo a, August thla chhunga a dawng turte'n an dawn ngei kan duhsakpui hle a ni," an ti.

Mi tam takin SEDP-ah Rs 3,00,000 an beisei laiin, sorkarin a tihhlawhtlinsak thei lo tih sawiin, tihlawhtling thei lo mah se, Rs 25,000 an sem mek tal chu second phase chhunga mite hnenah August 2023 chhung ngeia sem turin PC party chuan sorkar a ngen a ni.