Mizoram sorkarin Manipur ráltlânte buhfai qtl 2,388.50 chuang a pe tawh

Chief minister Zoramthanga chuan, Manipur aṭanga sahimna zawnga Mizorama lut, relief camp-a awmte tan Mizoram sorkarin buhfai quintal 2,388.50 chuang a pek tawh thu leh, Manipur ráltlânte tuamhlâwm nan cheng nuai 500 a pek tawh thu a sawi.

Nimina Independence Day lawmnaa thu a sawiah Chief Minister chuan, May 4, 2023 aṭanga Manipur-a buaina chhuakin Mizoram pawh a nghawng tel tih sawiin, "He harsatna rapthlak tak kan ṭhenawm state-a thleng mek hi Mizoram sorkar chuan chîk taka thlirin kan mi te, a bikin Imphal khawpuia awm zirlaite himna turin nasa takin hma a la a, Manipur aṭanga rawn raltlante chhawmdawlna lamah theihtawpin hma a la bawk," a ti.

CM Zoramthanga chuan, Manipur raltlante tan Aizawl leh district ṭhenkhatah relief camp siam a nih thu sawiin, "An tan buhfai quintal 2,388.50 chuang pek chhuah tawh a ni. Mizoram sorkar chuan kan unaute lo tuamhlâwm nan cheng vbc. 5 a sanction tawh a, central sorkarah pawh Manipur raltlante mamawh zualpui chhawmdawlna atan cheng vbc. 10 kan dil mek," a ti a; raltlante chhawmdawnna tura kohhran, pawl, ṭhian ho leh mimal tam takte inpekna ropui a tih thu a sawi.

Chief Minister chuan, Manipur-a buaina a chhuah ṭan tirh lamah Imphal-a Mizo awm mek mi 264-te thlawhtheihna hmanga thiar chhuah nan Mizoram sorkarin cheng nuai 36 chuang a sèn thu a sawi bawk.

Hetih lai hian Zoramthanga chuan, Ministry of Home Affairs thupek angin, Covid-19 vanga thi mi 709 hnenah Disaster Management & Rehabilitation department-in ralna (ex-gratia) a pe a, mi pakhat tan Rs 50,000 zel pek a nih thu sawiin, "Mizoram sorkar chuan frontline worker te, duty laia Covid-19 vanga thite ràlna atan an chhungte hnenah cheng nuai 20 zel a hlan bawk," a ti.

INDEPENDENCE DAY-A CHIEF MINISTER THUSAWI ṬHENKHAT

• Police-in July 14, 2023 thlengin ruihhlo, international market-a cheng vbc. 2,077.68 hû vel an man a; mi 610 man niin, thubuai 1,900 ziah luh a ni.

• Kum 2020-ah Cyber Crime Police Station din a ni a, chuta ṭanga tun thlengin sum rûk hmuh let zat Rs 36,75,268 a ni. Cyber crime-a inhnamhnawiha puh mi 64 zinga 18 thiam loh chantir an ni tawh.

• April 2023 aṭangin treasury 12-ah Integrated Financial Management System (IFMIS) hman ṭan a ni a, Mizoram sorkara state chhunga DDO 705 zinga 658-in IFMIS kaltlangin thla tin hlawh an la tawh.

• Lengpui Airport terminal building chei ṭhat hna 92.5% zawh a ni tawh a, elevated road siam mek 85% zawh a ni tawh.

• Kumin fûr chhunga buhfai indaih lohna a awm loh nan FCSCA department-in kudam 79-ah buhfai ṭhahnem tak a dah.

• FCSCA hnuaiah kudam hman lai 119 leh fair price shop (retailer) 1,258 a awm a, ration card 2,85,016 awmin, chutah chuan mi 11,64,005 hming ziah a ni. Mizoram pumah LPG distributor mi 60 leh filling station 68 a awm.

• Ministry of Home Affairs-in BADP hnuaia hmalakna atan cheng vbc. 13.956 a rawn pe tawh.

• Pradhan Mantri Kisan Samman Nidhi (PM-KISAN) hnuaiah loneitu 2,02,677 an inziak lut a, chu'ng zinga 41,465 chuan March 2023 thlengin instalment vawi 13 an dawng tawh.

• Mission for Integrated Development of Horticulture kalpui nan sorkar laipuiin kum 2023-24 atan cheng nuai 4,444.44 a dah a, kuminah thingfanghma mi 600, dragon fruit mi 200 leh mandarin orange mi 200 chìntir an ni.

• Sorkar sikul 500-a zirlaite’n cricket khelh an zirna turin Samagra Shiksha leh Cricket Association of Mizoram ten thawhhona thuthlung an ziak.

• African Swine Fever vangin kum 2021-ah vawk 12,568 suat a ni a, zangnadawmna atan sorkar laipui aṭangin cheng nuai 1,169.94 hmuh niin, chhungkaw 2,488 hnenah sem a ni. Kum 2022-ah vawk 11,686 suat a ni a, zangnadawmna pek tur sum nuai 526.633 sorkar laipuiah dil a ni.

• Mizoram sorkar college/higher institution zinga 83%-in NAAC accreditation an hmu tawh a, chawhrualin NAAC accredited higher institution neihah Mizoram chu India ramah pakhatna a ni.

• Mizoram Building & Other Constructions Workers Welfare Board-in financial year kal ta chhungin hamṭhatna hrang hrang Rs 14,39,52,000 an sem chhuak.

• Kum 2022-23 chhungin Transport department-in chhiah cheng nuai 4,903.26 a hmu.

• Kum 2022-23 chhungin cocoon (reeling cocoon) metric ton 698.982 leh raw silk metric ton 55.237 thar a ni.

• Secretariat Administration-in Secretariat-a Multi-Level Car Parking leh hmun dang aṭanga parking fee aṭangin Rs 11,63,290 a hmu tawh.

• Kum 2022-23 chhungin Taxation department-in hmuh a beisei zat cheng vbc. 900.03 a nih laiin vbc. 1,020.66 hmuh a ni a, kum khata chhiah hmuh ṭhat ber kum a ni. Sorkar kum kal mekah July 2023 thlengin cheng vbc. 415.84 hmuh a ni tawh.

• SEDP hnuaiah Land Resources, Soil & Water Conservation department-in chhungkaw 2,300 tan kuhva, chhungkaw 10 tan coffee leh chhungkaw 3,316 tan hmunphiah chìn a kalpui a, chu'nga hmalakna atan chuan cheng vbc. 14.20 hman a ni.

• Mizoram Journalist Welfare Scheme hnuaiah journalist leh an chhungte mi 47 damlo inenkawlna senso pek a ni a, tun hnaiah khan accredited journalist pahnih thi chhungte hnenah ex-gratia Rs 1,50,000 ve ve pek a ni.