KHAWTHLIR

KTP-in thisen pe

KṬP, Tuikual North Branch chuan an din champha vawi 16-na pualin nimin khan an kohhran hall-ah thisen pek huaihawtin, ZMC Blood Centre tan thisen unit 42 an pe a, petute mipa 28 leh hmeichhia 14 an ni.

Grape Festival

Hnahlan Grape Farming & Processing Cooperative Society Ltd. leh North East Wave-te chuan August 19, Inrinni khian Hnahlan Winery-ah Grape Festival - The Grape Escape an buatsaih dawn. Thu dawn danin, Festival hi SEDP sum aṭanga buatsaih tur a ni a, hnam làm leh rimawite pawh a tel dawn a ni.

Medical free clinic

Bungkawn Presbyterian Kohhran chuan an venga damdawi lam thiamte leh Synod Hospital-a department ṭhenkhatte nen ṭangrualin nimin khan an kohhran hall-ah Bungkawn veng pumpui tan a thlawna inentirna, Medical Free Clinic an buatsaih. Free clinic-ah hian mi 608 an inentir a, laboratory-a endik man zawng zawng kohhranin a tumsak bakah, mamawh­tute hnenah a thlàwnin damdawi pek a ni.

Hringnun Buanzawl

Makimi Khiangte lehkhabu ziah, 'Hringnun buanzawl' tih chu nimin khan MLA Lalrindika Ralte-in Synod Conference Centre-ah a tlangzarh. Lehkhabu hi phek 191-a chhah, Rs 200 man a ni.

Lehkhabu tlangzarh

Association of Theologically Trained Women of India, Mizoram Branch buatsaih 'A Theological Response to Mizo Women Contemporary Issues' tih chu nimin khan Dawrpui Presbyterian Kohhran Hall-ah Mizo Writers' Association president R Lallianzuala'n a tlangzarh. Lehkhabu hi hmeichhe theologian-te thuziak dahkhawmna a ni.

DC-in paih khap

Aizawl bawrhsap Nazuk Kumar chuan Serlui-A Gravity Water Supply Scheme awmna Serlui hnár lamah lung, leivûng leh thingtum paih khap a nih thu a tarlang. Thupek bawhchhiate chu IPC Section 188 hmanga hrem theih an nih thu a tarlang bawk.