Kumin aiin kum thara Mizoram sum hmuh tur a tlahniam - Dr Vanlalthlana
Zo Peoples Movement Legislature Party (ZLP) secretary Dr Vanlalthlana chuan, sorkar kum thara 15th Finance Commission aṭanga Mizoramin sum a hmuh tur chu a tlakhniam thu sawiin, "Leiba kan ngah leh dawn nge, sorkarin mipuite phurrit min siam dawn?" a ti.
Dr Vanlalthlana hian nimin khan ZPM pisaa inkhawmah thu sawiin, kum 2020-21 chhunga India ram budget pharh rualin 15th FC hnuaia state hrang hrangte sum hmuh tur pharh a nih thu a sawi a, "Kumin thleng hian 14th FC sum ruahman kan hmang a, sorkar kum thar aṭangin 15th FC sum ruahman kan hmang dawn. Finance Commission hian kum nga atana state-te sum hmuh tur a duang ṭhin a, Jammu & Kashmir avangin 15th FC hian kum khat atan a ruahman phawt a ni. Kan sum hmuh tur hi nikum aiin a tlahniam," a ti a; sorkarin sum hmuhna tur dang a zawn a ngaih tur thu a sawi.
Dr Vanlalthlana sawi danin, state pachhe deuhte budget-a sum hman tum leh hmuhna tur inthlauhna awm ṭhin tihziaawmna atan sorkar laipuiin state-te hnenah revenue deficit grant a pek ṭhin chu 14th FC hnuaiah chuan state 11-ah chuan kum tin a pung a ni. 15th FC-ah erawh chuan kum 2020-21 atan state pathum - Mizoram, Karnataka leh Telangana te sum hmuh tur a tlahniam. Mizoramin kumin 2019-20 atan cheng vbc. 2,716 a dawng a, kum (financial year) 2020-21 ah chuan cheng vbc. 1,422 a dawng dawn a ni.
State pathumte'n kum hmasaa an sum hmuh an phâk dawn loh avanga ṭanpuina Central-in a pek tur special grant chu cheng vbc. 6,764 a ni a, chuta ṭang chuan Mizoramin cheng vbc. 546 chiah a chang dawn. Mizoram state budget-a sum hmuh tum leh hman tumna inthlauh ṭhin avanga sorkar laipuiin ṭanpuina a pek chu a kiam dawn tihna a ni a; Mizoram leibá a pung tura ngaih a ni a, sorkarin a mangan tàwpah mipui aṭanga chhiah lâk an tipung thei bawk.
Kum 2020-21 atana Mizoram state budget tihpun ngei a ngaih dawn thu sawiin ZLP Secretary chuan, "Hlawhte a pung a, hnathawhna mante a sang zel a. Engtin nge budget hi tihpun a nih dawn kan la hre lo. MNF sorkar hmasaah khan GSDP aṭanga chhûtin leiba ngah ber kan ni a, Congress a rawn sorkar a, leibá tihniam zawngin an kal a, kan ziaawm chho a ni. Tunah hian leiba kan ngah leh dawn nge, mipuite phurrit min siam dawn? Fatuin bél an chhuang lian tawh si a, mipuiin cheng nuai 3 man sa ei ṭheuh kan beisei laiin, chaw urh chauh kan dawng palh ang tih a hlauhawm," a ti.
Dr Vanlalthlana chuan, Mizorama sorkar ding tawhte'n mipuite chu thawk chhuak ve turin an siam ngai lo tih sawiin, "Central aṭanga sawi chhuah tamte intihtheihna atan an hmang a ni. Mipuite thawh chhuah tisang tura ṭan lâk a hun tak zet. Chutiang sorkar a pian theihna atan village council leh local council aṭanga ṭan a ngai a, AMC-ah pawh councillor ngah a ngai a ni," a ti a; free wifi tih vela buai tâwk ni lo, hmasawnna ngaihtuah thiam Aizawl enkawltu AMC thlang turin mipui an inbuatsaih a ngaih thu a sawi.