Chief Minister hoin mau sâwngbâwlna tihchangtlun dan tur sawiho a ni

Chief minister Zoramthanga kaihhruaiin nimin khan CM Conference Hall-ah National Bamboo Missions (NBM)-in Asian Development Bank nena ṭang duna hmarchhak state pangaa mau behchhan industry-te tihchangtlun leh thawhhotir tumna, Bamboo Value Chain Development in North East, Mizorama kalpui dan tur an sawiho.

Bamboo Value Chain Development in North East hmang hian Mizoram bakah, Tripura, Meghalaya, Assam leh Nagaland-ahte hmalak tum a ni.

Ṭhutkhawmah hian, Bamboo Value Chain Development hmalakna Mizoramin a ṭangkai thei ang bera a hman theih nan leh mipuite'n hlawk taka an chhawr theih nan tuna mau hmanga industry kalpui mektute nen inràwnkhawmna neih phawt ni se, an ti a; hmalak theihna dang awmte nen a rang lama project thehluh an rêl.

Horticulture secretary K Lalthawmmawia'n NBM-in ADB sum hmanga hmalak a tum dan tlangpui leh Mizorama hmalakna tura State Bamboo Missions mawhphurhna tur te, department dang kaihhnawih awm thei ang chite leh thil pawimawhte a sawifiah a; Mizoram State Bamboo Missions mission director leh Horticulture director CH Lalmuanpuia'n ruahmanna an neih tawh chinte a sawi bawk.

Meeting-ah hian Bamboo Development Board vice chairman Dr K Pachhunga, chief secretary Dr Renu Sharma leh a kaihhnawih mi pawimawh dangte an tel a ni.