MZU-in tui laikîng chi thar an hmu chhuak

Mizoram University Department of Zoology-a Develop-mental Biology & Herpetology Laboratory-a research tite chuan tui laikîng (salamander) chi thar an hmu chhuak a, a hmingah Tylototriton Zaimeng an vuah.

MZU thuchhuak tarlan danin, tui laiking hi uchang leh chhawknghawl nena animal class inang, amphibian an ni a; amphibia hnuaiah order pathum - Anura (ichang leh uṭawk), caudata (salamander) leh gymnophiona (chhawknghawl)-te a awm.

Caudata (salamander) chu khawvel hmàr lam, hmun vawt lamah an awm a, tun thlengin salamander chi hrang (species) 39 hmuh chhuah a ni tawh. India ramah chuan kum 2015-a Nepal-a hmuh chhuah Tylototriton Himalayanus (Bhutan, Darjeeling leh Nepal-ahte an awm) chiah hriat chian a la ni rih.

India hmarchhak state ṭhenkhat - Arunachal Pradesh, Manipur, Nagaland leh West Bengal-ahte tui laiking (salamander) la hriat chian loh a awm tih hriat a ni a, tlangsanga ngawpui ṭha tak kara dîl leh tui awmnaah hmuh ṭhin a ni. An khawsakna chu hmun biru leh hel tamna hmunte a nih avangin zirchianna a la awm hlei thei lo tih an tarlang.

MZU Develop-mental Biology & Herpetology Labo-ratory-a zirbingmi (researcher)-te chuan Manipur-a tlang sang tak leh ngaw kara awm, Zaimeng dîl leh hmun hrang hranga tui laikingte chu an zir chiang a, an pianhmang leh deoxyribonucleic acid (DNA) an enfiah. An zirchianna aṭangin tui laiking awmte chu a chi (species) thar a ni tih hmuin, a hmingah díl hmingchawiin Tylototriton Zaimeng tiin an phuah a ni.

Heti hian khawvelah Tylototriton salamander species 40 hmuh a ni ta a, India ramah chuan species pahnih - Tylototriton Himalayanus leh Tylototriton Zaimeng chiah hriat chian leh hmuh chhuah a la awm.