Sialhâwkin lakhuihthei an thar tam; Khârchhàwngin an la hneh tâwk lo?

Khawzawl district-a Sialhawk khua chuan kumin chhungin lakhuihthei quintal 4,000 vel an hralh tawh a, khârchhâwngin an lak hneh loh avangin ṭhenkhat chuan Aizawlah an rawn zuar ṭhin.

Sialhâwk aṭanga Vanglaini thu dawn danin, an khuaah hian lakhuihthei chíngtu chhungkaw 250 vel an awm a, kuminah lakhuihthei qtl 4,000 hralh tawhin, qtl 4,000 vel hralh tur an la neih an inbei-sei. Khârchhâwngte'n Sialhawka an kal chilhin kg. khat Rs 12-in an laktir ṭhin a, cheng nuai 48 chuang man an hralh tawh.

Hetih lai hian, mi ṭhenkhat chuan an duh anga chaka khâr-chhâwngin an lak loh avangin lirthei hmangin an lakhuihtheite chu Aizawlah an zuar ṭhin a; Aizawlah chuan pum khat Rs 50-in an zuar a, a tê deuh chu pum thum Rs 100-in an zuar thung.

Sialhawka lakhuihthei chíngtute chuan, an huan/lo kawng a chhe hle tih sawiin, "Lakhuihthei lak hun lai vel hi chuan kan lak loh ni apiangin kawng siamin kan hnatlang a ni ber. Pick-up pawh nawr a ngai nasa ṭhin hle," an ti.

Huan panna kawng siamṭhatna atan tun hnaiah bialtu MLA Tawnluia, deputy chief minister leh Khawzawl DC aṭangin Rs 1,00,000 ve ve an hmuh thu sawiin lakhuihthei chíngtute chuan, "Pawisa hi zaù hrang hrangte'n kan insem a, kan feh kawng boulder (lung) hmanga hnawhna atan kan hmang," an ti a; Bialtu MLA leh Khawzawl DC chunga an lawm thu an sawi.

Sialhâwk khua hian Mizoram sorkarah lakhuihthei hmanga wine siam an dil mek a, a hlawhtlin dawn leh dawn loh an la hre lo. Lakhuihthei hmangin wine an siam thei a nih chuan an sum lak luh ṭhin a lêt hnih vela a pun theih an beisei a ni.