MSSSB-in exam vawi 96 a buatsaih

Sorkar kum liam ta, 2022-23 chhung khan Mizoram Subordinate Service Selection Board (MSSSB) chuan direct recruitment exam vawi 51 leh limited departmental exam vawi 45 an buatsaih a, a vaiin 96 a ni.

Chief minister Zoramthanga'n Inde-pendence Day 2023 lawmnaa thu a sawiah, "Kum 2022-23 chhung khan MSSSB chuan direct recruitment exam vawi 51 leh limited departmental exam vawi 45 an buatsaih a, PWD hnuaia JE, overseer leh section assistant-te tan departmental exam a buatsaih bawk. Heng bakah hian MSSSB chuan thawktu 983 tana kaisanna tur chingfelin, contract hnathawk 53-te dah nghehna tur a buatsaih fel tawh bawk," a ti.

Chief Minister thusawia tarlan danin, kum 2022-23 chhung khan Department of Personnel and Administrative Reforms (DPAR) hnuaiah post thar siamna tur rawtna 154 pawm a ni a, kaisanna hmangin post ruak 695 hnawh khah a ni a, chu'ngte chu direct recruitment aṭangin 543 leh limited departmental exam aṭangin 163 a ni.

Mizoram sorkara thawk mek contract employee 154 leh provisional employee 809-te DPAR-in a dah ngheh tawh thu Chief Minister thusawiah tarlan a ni bawk.