Deputy CM-in kudâm sak mek a tlawh

Deputy chief minister Tawnluia chuan nimin khan a bial chhung, Khawzawl Tuisenphaia Food Corporation of India (FCI)-in kudâm lian, food storage depot an sak mek a tlawh a; depot sak mek chu leimin vanga sak zawm rem lo palh thei a nih avangin hmun dang remchang dap turin Khawzawl Joint VC a chah.

Tawnluia chuan, FCI depot chu a chàwm tur khawchhak tlangdung khaw hrang hrang tana pan nuam leh remchang a nih thu a sawi a; depot sak meka leimin vanga harsatna awm chu chinfel a nih theih nan theihtawp chhuah a tum thu sawiin, "Food, Civil Supplies & Consumer Affairs department, FCI leh Geology & Mining department mithiamte nen a hmun ngeiah enfiah ni se," a ti.

FCI food storage depot sak mek hi buhfai metric ton 3,333 dâwl zo tura ruahman a ni a, Champhai district leh Khawzawl district-te châwm thei tura ngaih a ni. A sakna atan cheng nuai 1,800 ruahman a ni a, Satyam Construction-in June 2023 aṭangin an sa ṭan a ni.