Ram danga hna thawk tur thawntute lakah BJP-in FIR thehluh an tum

BJP, Mizoram thupuangtu Lalremsangi Fanai chuan nimin khan Aizawl Press Club-ah thuthar thehdarhtute a kâwm a; Dubai, Oman leh Syria vela Mizo hmeichhia, hna thawka awmte'n harsatna an tawh thu leh Aizawla an mahni buaipuitu agency pali lakah vawiin hian first information report (FIR) an thehluh dawn thu a sawi.

Lalremsangi Fanai chuan, Mizoram BJP-in ram páwna awmpui (house-maid) hna thawka awm Mizo hmeichhia, harsatna tâwkte tan theihtawp an chhuah dawn niin a sawi a, "Harsatna tâwk Mizo hmeichhiate hi a tlangpuiin thingtlang aṭanga kal an ni. Mizoram BJP chuan theihtawp chhuahin kan pui dawn a, FIR pawh kan buaipui ang a, sum leh pai sen tur a awm pawhin kan tihsak vek ang," a ti.

Tuna Dubai, Oman leh Syria vela Mizo hmeichhia buaina tâwk mekte tírtu leh kawhhmuhtu, Dubai hmuna agent chu Myanmar lama Mizo a nih thu sawiin Lalremsangi chuan, Dubai Mizo Welfare hruaitute pawhin hna thawk tura kal tawh lo turin Mizote an ngen niin a sawi.

BJP thupuangtu chuan, tualchhhungah awmpuite hlawh ṭha zawk state sorkarin a bituk leh hna nei lote tan hna tam tak siam belh a ngaih thu a sawi a, "Hei hi BJP tel sorkar thara kan hmalakna hmasa tur a ni," a ti.

BJP THUPUANGTU SAWI ṬHENKHAT

▶ Hna kawhhmuhtu Mizorama agent-te'n passport leh tourist visa an lo buaipui ṭhin.

▶ Hna thawktute thawh chhuah aṭanga eizawnna kalpuitute'n security an pe lo.

▶ Ram ṭhenkhatin an rama hna thawkte himna (security) an pe ṭha lo hle.

▶ India passport, visa leh work visa nei lo, dan bawhchhe nghalin mi ramah an intír lut ṭhin.

▶ Tuna harsatna tâwk tam takte hi an lo haw theih ngei kan beisei a, anmahni leh an chhungte thlamuang taka awm turin kan chah.