Decentralised Procurement Scheme kalpui turin Mizoram sorkar an ngen
Rorelna Dik Duhtute chuan nimin khan Aizawl Press Club-ah thuthar thehdarhtute an kâwm a; Mizoram sorkar chu Decentralised Procurement Scheme kalpui tur leh rice mill din belh turin an ngen tih an puang.
Rorelna Dik Duhtute aiawh Lalrammawia chuan, Decentralized Procurement Scheme chu Mizoram sorkarin sum tam tak a hum theihna tur a nih thu sawiin, "Decentralized Procurement scheme hmang hian Mizoram sorkar chuan state dang leh state chhunga buhhûmte leiin, rice mill-ah hertir se, sum tam tak sên ral a zia ang a, loneitute tan buh tuh hlâwkna a awm ang," a ti a; Decentralized Procurement scheme hmanga buhhûm leina sum chu sorkar laipui aṭangin hmuh lêt (re-imbursement) theih a nih thu a sawi.
Lalrammawia chuan, Mizoramah Decentralized Procurement Scheme kalpui tuma hmalakna a awm nual tawh nia sawiin, "Department-a file a kal dan kan hriat ve chinah pawh kan Chief Minister hian nikum 2022 tìr lam khan scheme kalpui a duh thu file-ah a ziak tawh. A puitlin tâk loh avangin a reh zui a, kan ui khawp mai. Kuminah Rajya Sabha MP Pu K Vanlalvena'n sorkar laipuiah a thlen a ni," a ti.
Kuminah buh seng hun a thleng dawn hnai tawh tih sawiin Lalrammawia chuan, "Kan pelhsawlh kan hlau a, kan sorkar hian chak taka kala hma a lak ngei hi kan duh," a ti a, Mizoram sorkarin hma a lak loh chuan loneitute nen ṭang tlangin hmalak an tum thu a sawi.
AN TARLAN ṬHENKHAT
■ Mizoram zau zawng aṭanga chhûta hectare 50,000 (3.5%) vel buh chìnna atana hman theih a nih laiin, hectare 15,000 vel chiah kan hmang.
■ Decentralized Procurement Scheme kaltlangin loneitute buhhûm tharte Mizoram sorkarin sorkar laipui pawisain a lei thei.
■ Phai aṭanga buhfai lei aiin, Mizoram sorkar hian kan intodelh lohna zat buhhûm phai aṭangin sorkar laipui sumin a lei thei.
■ Sorkarin buhhûm a leite chu rice mill-ah hertir se, buhfai tharlám kan nei thei ang.
■ Mizorama leilet hrang hrang bakah, leileta siam theihna hmunah ruahmanna ṭha a awm chuan kum khatah buhfai vawi hnih kan thar thei.