MGNREGS-ah ni 27 inhlawhna siam tawh

Mahatma Gandhi National Rural Empoyment Guarantee Scheme (MGNREGS) hnuaiah Mizoram sorkar chuan kum kal mek 2023-24 atan chhungkaw 2,15,649 hnenah job card a pe a, ni 27 inhlawhna a siam tawh tih Independence Day-a chief minister Zoramthanga thusawiah tarlan a ni.

Chief Minister thusawia tarlan danin, Pradhan Mantri Awaas Yojana Gramin (PMAY-G) hnuaiah chenna in thar 6,969 sak zawh a ni tawh a, in sak mek 13,543 a awm. Kum 2022-23 chhung khan MzSRLM hnuaiah Mizorama RD block 26-ah self help group (SHG) 1,417 a awm a, chutah chuan chhungkaw 10,543 an tel. SHG leh village organisation-te hnenah community fund cheng nuai 2,751.77 pek a ni tawh.

Shyama Prasad Mukherji Rurban Mission (SPMRM) kaltlangin Aibawk, Thingsulthliah, East Lungdar leh Khawzawl cluster tan Ministry of Rural Development chuan critical gap funding (CGF) sum cheng vbc. 15 a pawm a; Pradhan Mantri Awaas Yojana (Awaas+) 2022-23 hnuaiah in sak ṭanpuina dawng tur mi 9,462 thlan a ni.

Farm Livelihoods Intervention hnuaiah hmeichhiate dâwmkàn nan khaw 61 aṭangin Mahila Kisan thar atan hmeichhia 10,318 chhinchhiah a ni a; WDC-PMKSY 2.0 hnuaiah tui dawh khâwlna 141 leh dîl (amrit sarovar) 70 leh tui khawlna tur thil dang 83 siam a ni tawh bawk.