Hnahthialah Youth-20 Meet buatsaih

Sports & Youth Services department leh MZP chuan nimin khan Hnahthial Electric Veng community hall-ah ‘Youth-20 Meet on Nationalism, Patriotism and Development’ an buatsaih a, bialtu MLA Dr R Lalthangliana, minister-in a hmanpui.

Dr R Lalthangliana chuan, Mizoramin hma a sawn nan leh hnam a boral loh nan zirna ngaih pawimawh a ṭul tih a sawi a, "Thiamna leh technology ṭhang chak takah mi dang ûm pha ve tur chuan thiamna tak tak neih a ṭul. Zirna lama chîmralnain hnam boralna a thlen thei," a ti a; Mizorama hna sáng leh liana dinhmun pawimawhte Mizote'n an luah vek theih nan ṭan la thar turin ṭhalaite leh zirlaite a fuih.

Cancer Super Specialty Hospital sak tur te, NEP 2020 tihhlawhtlinna tura state university din turah leh sorkar inrêlbâwlna hrang hrangah a khaikhawmtu ni turin Mizo ṭhalaite'n theihna an neih thu sawiin Minister chuan, "Mi dang hlawhtlingte huphurh ena en loin, ka thei ve a ni tih rilru pu chungin theihtawp chhuah ang che u. Mi dangte tana nun hi kan dam chhan a ni," a ti a; ram leh hnam tan nasa zawka ke pên turin kal khawmte a sáwm.

Youth 20 Meet-ah hian MZP Gen.Hqrs president Lalnunmawia Pautu leh MZP adviser Lalnunṭawma te pawhin thu an sawi a ni.