Khawzawl Auditorium lungphùm phúm

Urban Development & Poverty Alleviation enkawltu deputy chief minister Tawnluia chuan nimin khan Khawzawl Vengthara PWD Complex-a Khawzawl Auditorium sak tur lungphùm a phúm.

Khawzawl Auditorium sak tur hi UDPA department kaltlangin state sorkar sum nuai 642 (Rs 6,42,92,565) hmanga sak tur a ni a, chhâwng thum a ni ang. Mi 368 lenna hall bakah, lirthei hûnna, cafetaria, chowkidar quarters, plant room, VIP lounge leh gallery a awm dawn a ni.

Deputy Chief Minister chuan, Tuichang assembly constituency-ah UDPA enkawl urban town pahnih - Khawzawl leh Khawhai a awm a, Khawzawl district-ah urban town pathum a awm thu a sawi a, "Khawpui tihchangkan, tihchangtlun leh tihthianghlim kawngah chak takin UDPA chuan hma a la zel a ni," a ti.

Tawnluia chuan, Tuichang bial chhunga khaw tinah tui lâk hna thawh zawh thawkhat a nih tawh thu sawiin, "Khawhai, Riangtlei leh Vangtlangahte chak taka hna kalpui mek a ni," a ti a; hriselna lamah Khawzawl district mipuiin hma an sawn theih nan chak taka hmalak mek a nih thu a sawi bawk.

Lungphùm phùmna inkhawm hi UDPA secretary Lalmalsawma Pachuau-in a kaihruai a, Khawzawl bawrhsap K Lalrohlua'n thu a sawi bakah, UDPA joint director Andrew Lalhruaia'n auditorium sak dan tur a sawifiah a ni.