KVK leh kut hnathawktute inkâwm

Krishi Vigyan Kendra (KVK), Khawzawl chuan nimin khan Khawhai VC House-ah kut hnathawktute nena inkawmhona, Farmers Scientist Interaction an buatsaih a, kut hnathawktu mi 70 an tel.

KVK-a mithiamte leh kut hnathawktute hian tomato chìn leh enkawlnaa harsatna hrang hrang - white fly, leaf curl virus leh tomato rah keh chungchang an sawiho. Kut hnathawktute hnenah hian Indian Institute of Horticulture Research (IIHR) NEH aṭangin tomato chi Arka Samrat leh Arka Abed sem a ni.

Khawhaiah hian kum 2022 khan chhungkaw 54-in tomato an chíng ṭan a, kg. 7,070 an thar tawh. KVK Khawzawl hian Rabung khuaa chhungkaw 70, Chawngtlaia chhungkaw 40, Neihdawna chhungkaw 30 leh Ngaizawla chhungkaw 10 hnenah Arka Samrat leh Arka Abed tomato chi an pe bawk.