'Bravehearts of Mizoram' tlangzarh

Governor Dr Hari Babu Kambhampati hmalakna anga Raj Bhavan-in lehkhabu a buatsaih, Mizoram mi, India sipai huaisen 56-te chanchin tarlanna, 'Bravehearts of Mizoram' tih chu nimin khan Gover-nor-in Raj Bhavan-ah a tlangzarh.

Tlangzarh inkhawmah hian martarte chhung leh khat mi 20 chuang an tel a; Dr Hari Babu Kambhampati chuan, martar chhungte hnenah, an hmangaih kal tate chu pasalṭha, mi huaisen leh martar an nih thu a hrilh a, anmahni chawimawina leh hriatrengna atan an chanchin tawi ziahna lehkhabu siam chu tihmâkmawh a nih thu a sawi. Martar chhungte pawhin Governor hnenah an harsatnate pawh an thlen nghal.

Mizoram aṭanga India sipaia ṭang zinga martar mi 56-te hming National War Memorial, New Delhi-ah tarlan a ni a, 'Bravehearts of Mizoram' tih lehkhabu pawh National War Memorial-a an hming tarlante chanchin lak khawm aṭanga buatsaih a ni.