KHAWTHLIR

ECI rawn zin dawn

Chief secretary Dr Renu Sharma kaihhruaiin nimin khan CS conference hall-ah sorkar hotute'n August 29, 2023-a Mizorama lo zin tur Election Commission of India hotute lo dawnsawn dan tur an sawiho. ECI hotute hi Chief Election Commissioner hoin constitutional authority pathum leh official dang 17, an vaiin mi 20 an lo zin dawn a ni.

KTP-in thisen pe

KṬP, Kolasib Tuiṭha Veng Branch chuan nimin khan Kolasib District Hospital tan thisen unit 11 an pe a, petute mipa 10 leh hmeichhia pakhat an ni.

Heroin & meth man

East Lungdara police-te chuan August 15, Thawhlehni khan lirthei pakhatah Md Ekbal Hussain (21), Brahman Shasan, Karimganj district leh Sayad Uddin (27), Dasgram, Karimganj district, Assam-te hnen aṭangin heroin gram 548.15 (hawng 39) leh methamphetamine kg. 5.32 (mûm 50,000) an man. Ruihhlo kawltute lakah hian North Vanlaiphai Police Station-ah thubuai ziah luh a ni.

Lemziakbu sem

Aizawl North-II bialtu MLA Dr Vanlalthlana chuan nimin khan a bial chhunga middle school zirlaite tan lemziakbu (comics) a sem. Lemziakbu a sem hi Vanneihtluanga leh C Laizawna te buatsaih a ni a, MLA fund hmanga lei khawmin a sem a ni.

Foundation Day

Pachhunga University College chuan nimin khan an seminar hall-ah PUC Foundation Day vawi 65-na an hmang a, Mizoram University registrar Prof. Lalnundanga'n a hmanpui. PUC din champha pual hian PUC-a thawkte leh zirlaite'n an thawhkhawm Rs 2,40,000 chu Aizawla home pali hnenah  Rs 60,000 ṭheuhin an hlan a ni.

Lei tlahniam tlawh

Assembly deputy speaker H Biakzaua, Lawngtlai East bialtu MLA chuan nimin khan Lawngtlai-III leh Lawngtlai Electric Venga lei tlahniam a tlawh a, hnatlang ei leh in senso atan Rs 5,000 a pe. Lawngtlai Electric Vengah hian lei tlahniam vangin chhungkua 23 sawn chhuah an ni a, in pahnih ṭhiah a ni tawh bawk.

Meri Matti Mera Desh

Mamit district bawrhsap VL Remliana hoin nimin khan DC conference hall-ah Meri Matti Mera Desh hman a ni. August 9-15, 2023 chhung khan Mamit district-a RD block paliah ram tana nun hlântu sipaite lungphun panga siam a ni a, hmun 69-ah Karavya Path hmuna martarte huan 'Amrit Vatika' siamna tur lei lak a ni. Thing ṭiak 3,540 phun a ni a, hmun 77-ah hnam puanzar pawh pharh a nih bakah, ram tana inpekna tithar leh turin mi 13,744-in thu an tiam bawk.

MTET result

Mizoram Board of School Education chuan vawiin chawhnu dar 3:30 hian Mizoram Teacher Eligibility Test (MTET) exam result a tichhuak dawn. Chaltlanga MBSE pisa bakah, online-in www.mbse.cdu.in leh www.mbseonline.com ah result en theih a ni ang.