Ka dept-in budget páwn aṭangin Nuai 73,493 a thawk chhuak - RRRa

Minister of state Robert Romawia Royte chuan nimin khan Aizawl Press Club-ah thuthar thehdarhtute a kâwm a, a department chan pathum aṭangin state budget-a an chanpual páwn lam aṭangin cheng nuai 73,493.79 a thawh chhuah thu a sawi.

Robert Romawia Royte chuan, minister a nih aṭangin a thawhpuite nen theihtawpin hma an la tih sawiin, "State budget aṭangin hmasawnna hna thawhna tur sum kan nei lo. Hei vang hian DPR tam tak kan siam a, Pathian zarah hmasawnna hna thawhna atan sum eng emaw zat kan thawk chhuak a ni," a ti.

Construction project-ah Goods and Service Tax (GST) chu January 2022 hma lamah 12% a nih thu sawiin Minister chuan, "July 2022 hnu lamah chuan 18%-ah a pung a, labour cess 1% a ni," a ti a; an department project-te aṭanga sorkarin sum a hmuh chu cheng nuai 10,000 chuang ni tura an chhût thu a sawi.

Robert Romawia chuan, chief minister Zoramthanga'n hmasawnna atan union budget sum a pawimawh tih a hriat thu sawiin, "Chumi hmu tura chêt a phal a, ka department officer-te leh staff-te nen lungrual taka ṭanghoin, Mizoram budget tihek lo zawnga hna tam tak kan thawk thei hi ka lawm hle," a ti.

Sports Minister chuan, ṭhalaite'n khelmuala phûllem phah an mamawh thu sawiin, "Tun term chhung sak tura ruahman 30 zinga 21 hi Sports department hmalaknaa thawh a ni a, 14 zawh tawh niin, pasarih thawh mek a ni. UDPA leh Smart City aṭanga thawh pakua a awm," a ti a; khelmual leh phullem phahna atan SYS department-in cheng nuai 12,000 an hmuh thu a sawi.

Mi ṭhenkhatin PMJVK chungchangah thu dik lo an sawi ṭhin nia sawiin Robert-a chuan, "Mizoramin dan ang thlapa sanction a hmuh ang zelin a takin hma a la. Tunah hian 50% chauh sum la hmuh a ni chungin 65% vel hna thawh zawh a ni tawh. Ministry-in state pathum hnenah sum release belh tur leh project thar ngaihtuah tura a thlan zingah Mizoram a tel," a ti.

Tourism Minister chuan, an department chu tereuhtê a nih thu sawiin, "Mizote'n zalenna kan sual dan hi kan history tiropuitu a ni. Mizo tlangvalte'n ke ngata kalin China aṭanga ralthuam an han la a, chu'ng zing damte chawimawina leh hriatrengna atan 'Meet the Heroes, Peace Pay' programme buatsaih a ni a, a hlawhtling hle," a ti a; chumi atana sum senso chu sorkar laipuiin a tum vek thu a sawi.

Robert Romawia chuan a enkawl dang Information & Communication Technology department chungchangah, PMJVK scheme hnuaiah thing­tlanga sikul 20-ah cheng nuai 350.8 hmangin smart class room siam a nih thu a sawi.

ICT Minister sawi danin, PMJVK hnuaiah vêk cheng nuai 693 hmangin IT Skill Development & Training Centre in Minority Concentration Areas of Mizoram kalpui a ni a; Establishment of OPGW & ADSS for Backbone Connectivity of District and Blocks in Mizoram atan SASCI 2022-23 Part V hnuaiah cheng nuai 5,000 tawh a ni.

Sports, Tourism, ICT leh District Council & Minority Affairs (DCMA) changtu Robert Romawia chuan, DCMA department a enkawl hnuah hna thawhna hun a la awm loh avangin hmalakna tarlan tur a neih ve loh thu a sawi.

ROBERT ROMAWIA THUSAWI DANG

◆ India rama a vawi khatna atan Mizoram sorkarin sports chu industry nihna a pe.

◆ MNF manifesto tihlawhtlingin Mizoramin a la neih ngai loh Sports Policy ṭha tak kan sorkàr aṭanga kum khat hmain peih a ni.

◆ Group B non-gazatted hnuai lam hna ngheta direct recruitment-ah sport thiam bikte tan 5% hauh a ni.

◆ Mizoram Sports Policy-in a sawi angin sport complex cheng nuai 4,919.31 séngin Lungleiah, cheng nuai 5,019.53 sengin Lawngtlaiah leh, cheng nuai 4,496.19 sêngin Mamitah siam a ni.

◆ Lengpuiah moto sports racing track siamna atan Ministry of Power hnuaia REC aṭangin cheng nuai 750 leh SASCI aṭangin cheng nuai 800 hmuh a ni.

◆ NESIDS aṭangin Reiekah tourism infrastructure siam belh a ni a, cheng nuai 560 sêngin thil tam tak siam thar a ni.

◆ Kum 2020 tirah Zampuitlang leh Churachandpur-ah Insuihkhawm Zo Kûtpui neih a ni a, Covid avangin Tahan, Bangladesh, etc.-ah neih theih a ni lo.

◆ Mizoram Responsible Tourism Policy Act leh Rules siam a ni.