Ruihhloin zirlaite a man lohna turin nu leh pate'n fate an vèn ṭhat a ṭul - Education Minister

School Education minister Lalchhandama Ralte chuan, Mizo zirlai ṭhenkhat zingah ruihhloin bu a khuar nasa tih sawiin, ruihhloin zirlaite a man beh lohna turin nu leh pate'n an fate an vèn ṭhat a ṭul thu a sawi.

Education Minister hian MZP Sub-Hqrs, Mamit-in nimina Chhimveng YMA Hall-a zirlai ti ṭhate an chawimawinaah thu sawiin, "Zirlai naupang ṭhenkhat zingah ruih theih thilin bu a khuar nasa hman a, a pawi hle. Ruihhlo hmuh tur a tam tial tial a, kan naupangte a man beh loh nan nu leh pate'n mahni fate chîk leh vên a pawimawh," a ti.

Zirlaite chu ruihhlo ti chunga lehkha zir an hlawhtling ngai lo tih hre reng tura kaihhruai a ṭul thu sawiin Lalchhandama chuan, "Tunlai khawvel inelnaah hlawhtling tak tak tur chuan tawrhchhel, taimak, tumruh leh teirei peihna nena ṭan lak a ngai," a ti a; zirlai hlawhtling chawimawite chu inelna sangah tling thei tura theihtawp chhuah zel turin a fuih.

Minister chuan, "Kan ramin a mamawh chu lehkhathiam hnam thinlung pu, mahni nu leh pa ṭhansan lo, khawtlang leh kohhran nun ngaihsan nachang hria an ni," a ti bawk.

Chawimawina inkhawmah hian kumina HSLC, HSSLC leh degree course-a ti ṭhate leh top 10-a langte hnenah chawimawina hlan a ni a;bialtu MLA H Lalzirliana, Mamit DEO Laldingliana leh MZP Gen.Hqrs President-te pawhin thu an sawi a ni.