Party-te'n BJP do turin MSA an din; Tel ve turin MNF leh ZPM an sáwm

18th August, 2023

Political party ṭhenkhatin an din Mizoram Secular Alliance (MSA) hruaitute chuan nimin khan Aizawl Press Club-ah thuthar thehdarhtute an kâwm a; MSA-ah hian Congress party, PC party leh ZNP an awm tih sawiin, tel ve turin MNF leh ZPM party an sáwm.

MSA aiawh thu sawitu John Siamkunga, MPCC general secretary chuan, BJP sorkar hnuaiah sakhaw zalenna rahbehin a awm mek nia sawiin, "Kum 2014-a BJP-in central-a thuneihna a chan aṭang khan hnam tênau leh Kristiante kan chêp sâwt em em," a ti.

John Siamkunga chuan, October 2022 khan RSS-a an hotu lu Mohan Bhagwat-a'n, 'India hi Hindu ram a ni tawp mai a ni, sawi buai theih a ni lo,' tiin a sawi nia sawiin, "Hindu lal ram din turin an bei zel dawn tih an sawi bawk," a ti a; prime minister Narendra Modi kaihhruai sorkarin RSS thil tum, Hindi lal ram din turin chakna thahrui an nei ṭha tâwk niin a sawi.

BJP-in India ramah Uniform Civil Code (UCC) hmang turin hma a la mek tih sawiin John Siamkunga chuan, "Keini Kristiante leh hnam tlém zawk tan a hauhawm em em a, Kristian dana inneihna te, thil in rochun chungchangahte kan thû thei tawh dawn lo. Sakhaw lian ber leh tam ber dan hi kan hman a ngai dawn tlat a, UCC kan hman lohna turin BJP paihthla thei tur party ṭangrual pawl kan vote a ngai a ni," a ti.

MSA TARLAN DANGTE

▶ India danpui aṭanga sakhaw zalenna, Secular tih paih turin Parliament-ah BJP-in MP an ngah tâwk.

▶ Tuna BJP-in an mamawh her chu BJP sorkarna state 15 aia tlem lo neih a ni a, chumi nei tling tur chuan an ṭang nasa.

▶ BJP MP-te chakna hmanga secular paih chu BJP lalna state 15 aia tlem loin an pawmpui a ngai a, tunah hian BJP lalna state 11 a awm mek.

▶ State 15-ah BJP-in lalna an chan a, an thil tum an pawmpui chuan sakhaw zalenna hi kan chán dawn.

▶ Mizo mipui, Kristian ṭha tak takte hi ṭang khawm ila, BJP leh a thawhpui party-te hi inthlanah hnâwl ang u.

▶ Parliament-a Forest Conservation Amendment Bill, 2023 pass tawh chu ṭhiat leh turin BJP leh a thurualpui party ni lo kan thlan tlin a ngai.