RD Minister-in RD Secretary a kâwm

Rural Development minister Lalruatkima chuan August 16, Nilaini khan New Delhi-ah Ministry of Rural Development secretary Shailesh Kumar Singh chu a pisaah a kâwm. RD Secretary chuan, Cluster Facilitation Project kaltlanga Mizoram tana pawisa an la pek chhuah lohte chu kar lehah pek an tum thu a lo hrilh.

Sorkar thuchhuah tarlan danin, RD secretary Shailesh Kumar Singh chuan, ni 100 inhlawhna tur pawisa chu financial year 2023-24 atan Mizoram sorkar hnenah an pek tur thu a sawi a; RD Ministry hnuaia Cluster Facilitation Project kaltlanga RD Ministry-in Mizoram tana sum an la pek chhuah lohte pawh kar lehah pek chhuah hman an tum thu minister Lalruatkima a hrilh a ni.

Shailesh Kumar Singh chuan, National Rural Livelihood Mission hnuaia thingtlanga self help group-te'n eizawnna atana an hman tur lirthei pekna scheme, Ajeevika Grameen Express Yojana (AGEY) chu Mizoram tan an pek thuai tur thu a sawi a; chuta tan chuan RD Ministry-a a khawihtute hnenah sanction buaipui nghal turin a hriattir nghal a ni. RD Secretary hian Mizorama kal a châk thu leh inthlan hma ngeia tlawh a tum thu a sawi bawk.

Minister Lalruatkima Mizoram RD joint secretary Ethel Rothangpuii'n a ṭawiawm a ni.