Ram páwna hna thawkte harsatna kaihhnawihah police-ah FIR thehlut

India ram páwna hna thawka awm Mizo, harsatna tawk mekte hruai haw an nih theih nan harsatna tâwkte chhungte chuan BJP thupuangtu Lalremsangi Fanai hoin nimin khan Aizawl SP-ah leh SP, CID-ah first infor-mation report (FIR) an thehlut.

Hemi chungchangah hian BJP chuan thuchhuah siamin, "India ram páwna hna thawk tur Mizo ṭhalaite tirh chhuah chungchangah, an kalna tur ram dang dan hriat tâwk loh vanga bawhchhiatna te, ram dangte nunphung ziaráng danglam bik vangtein Mizo zingah harsatna hrang hrang tâwk an tam a, hengte hian BJP, Mizoram hotute hnenah puih theihna kawng dappui turin an rawn ngen a ni," an ti.

Mizoram BJP chuan, ram danga Mizote'n harsatna an thawh chungchangah Ministry of Home Affairs, External Affairs Ministry leh Mizoram sorkar thuneitute leh, India rama embassy/consulate-te an biak tawh thu an tarlang a; Mizoram police hnenah FIR thehluh a, private employment agency/placement agency zawng zawng chhui chhuak a, dan bawhchhiate hriat hmasak a ṭul thu an sawi.

BJP chuan, Mizo ṭhalai, ram páwna hna thawk, harsatna tâwk mi eng emaw zat an ṭanpui a, Mizoramah an hruai haw tawh ṭhin niin an sawi a; tuna harsatna tâwkte leh an chhungte chu lungngai lo turin an chah a ni.